Қазақстанда «ақылды» қалаларға шамамен 30 миллиард теңге жұмсалды. Алайда жобаны «Цифрлық Қазақстан» бағдарламасы бойынша аяқтай алмады және мерзімін 2023 жылға дейін жылжытты, деп хабарлайды Qazaqpress Bizmedia.kz-ке сілтеме жасап.
«Цифрлық Қазақстан» бағдарламасының жұмысы бойынша есеп комитеті өз қорытындысында Қазақстанда үш жылдың ішінде смарт қалаларға 30 миллиард теңгеге жуық қаржы жұмсалғанмен, жоба соңына дейін аяқталмағанын айтқан.
Мемлекеттік бағдарлама Қазақстанда «ақылды» қалаларды қалыптастыру мәселесін шешуді көздеді: қаланың тұрақты дамуын қамтамасыз етіп, туристер мен тұрғындарға қолайлы жағдайлар жасау үшін қалалық қызметтер мен жеке бастамалардың ресурстары өзара әрекеттесетін және ынтымақтасатын урбанизацияланған аумақты құру керек.
Жобаға кірген бес қала анықталды: Алматы, Нұр-Сұлтан, Шымкент, Ақтөбе және Қарағанды, олар ICRIAP бекіткен «ақылды» қалалардың халықаралық рейтингіне кіру тиіс еді.
Министрлік 2019 жылы Қазақстандағы ақылды қалалардың үлгісін әзірлеген болатын.
«Сонымен қатар, ақылды қалалардың халықаралық рейтингке кірудің негізгі шарттарының бірі шетелдік сарапшылардың қызметтеріне ақы төлеу (орта есеппен $25 000), бұл рейтингтің коммерциялық сипатын көрсетіп тұр және оған жүгінудің дұрыстығына күмән бар», – деді Есеп комитеті.
2018-2020 жылдың қорытындысы бойынша рейтингке екі қала ғана енген: Алматы мен Нұр-Сұлтан. Әр өңірдің іс-шараларды жүзеге асыруға жұмсаған жалпы шығыны 29,89 млрд теңгені құрады.
«Цифрлық Қазақстан» мемлекеттік бағдарламасы аясында «ақылды» қалаларды қалыптастыру міндеті жүзеге асырылған жоқ және «Цифрландыру, ғылым және инновациялар арқылы технологиялық серпіліс» ұлттық жобасына көшірілді. (3 іс-шара. «Ақылды» қалаларды дамыту және енгізу мерзімі – 2023 жыл)», – деп мәлімдеді Есеп комитеті.
«Ақылды» қалалар деген қандай жоба?
Қалалық қызметтердің тиімділігін арттырып, Қазақстанда смарт технологияларды енгізу мақсатында «Smart city» концепциясы әзірленді.
Smart city – бұл қала ресурстары мен қызметтерін басқаруды жақсарту және азаматтарға қолайлы жағдай жасау үшін инновациялық технологияларды енгізу арқылы инфрақұрылымды дамыту жобасының бастамасы.
Елбасының тапсырмасына сәйкес, смарт қалаларды салу тәсілін стандарттау мақсатында 2019 жылы Қазақстан Республикасының «Ақылды қалалар» жобасының үлгісі бекітілді. Мұндай қалалардың негізгі бағыттарына қауіпсіздік, көлік, тұрғын үй, коммуналдық қызметтер, білім беру, денсаулық сақтау және қаланы басқару жатады.
2020 ж. соңында жасалған «ақылды» қалалар бойынша Қазақстан Республикасының ішкі рейтингі
| ОРЫН | ҚАЛА | РЕЙТИНГ |
| 1 | Алматы | 70,4% |
| 2 | Нұр-Сұлтан | 64% |
| 3 | Қарағанды | 64% |
| 4 | Атырау | 64% |
| 5 | Өскемен | 61% |
| 6 | Ақтөбе | 61% |
| 7 | Орал | 61% |
| 8 | Қызылорда | 61% |
| 9 | Талдықорған | 61% |
| 10 | Көкшетау | 60,8% |
| 11 | Қостанай | 60,8% |
| 12 | Шымкент | 60,8% |
| 13 | Түркістан | 60,8% |
| 14 | Петропавл | 57,6% |
| 15 | Тараз | 57,6% |
| 16 | Ақтау | 54,4% |
| 17 | Павлодар | 54,4% |
Сіз жаңалықтар туралы не ойлайсыз