Тромбоз — қанның қан тамыры ішінде ұйысуы және қан ағынын бөгейтін тромбтың түзілуі. Ол ағзаның кез келген жерінде орын алуы мүмкін, бірақ көбінесе қанның ұйысуы аяқтың терең тамырларында болады деп түсіндіреді No36 қалалық емхананың қан тамырлары хирургі Жандос Аспараев.
Тромбоз миокард инфарктісі, инсульт, пневмония сияқты ауыр асқынуға, тіпті өлімге әкелуі мүмкін. Қан тамырлары қан ұйығымен бітеліп қалса, қан дене тіндеріне оттегі мен қоректік заттарды жеткізе алмайды, бұл зақымдану немесе өлімге әкеледі.
«Терең тамыр тромбозы кезінде өкпе тромбоэмболиясы сияқты қауіпті асқыну дамуы мүмкін. Бұл жағдайда тромб тамыр қабырғасынан бөлініп, өкпеге өтіп, қан тамырларын бітеп, тыныс алудың бұзылуына әкеледі», — дейді маман.
Тромбоздың даму қаупі факторларына тұқым қуалаушылық, кейбір аурулар (мысалы, қатерлі ісік), жарақат және хирургиялық араласу, ұзақ отыру немесе аяқты бүгіп тұру, жүктілік және контрацепцияны қолдану жатады. Сонымен қатар, тромбоз гемоглобин 100 г/л-ден төмен болған кезде де болуы мүмкін.
Тромбозды емдеу антикоагулянттарды (қанды сұйылтатын препараттар) және компрессиялық терапияны (қан айналымын жақсарту үшін компрессиялық шұлықтарды немесе бинттерді пайдалану) қолдануды қамтиды. Кейбір жағдайда тромбты жою үшін хирургияға жүгіну қажет болуы мүмкін.
Сондықтан қауіп факторын біліп, оны азайту үшін физикалық белсенділік, салмақты бақылау және темекі шекпеу сияқты шараларды қолдану маңызды.
Тромбозға күдіктенсеңіз, диагностика және емдеу үшін дәрігерге көрініңіз.
Дәрігердің айтуынша, ағзада қанның сұйылуына көмектесу үшін каштан, пион тамыры, түрлі жидек, зәйтүн майы, інжір, талдың қабығы, сарымсақ, лимон, апельсин, анар, қызылша сияқты тағамды жеу керек.
Жандос Аспараев көбірек су ішуге кеңес береді.
Тромбоздың алдын алу қашанда бірнеше жолмен және кешенді түрде жүргізілуі керек. Ең алдымен дене белсенділігін қалыпқа келтіру, еңбек жағдайын дұрыс ұйымдастыру, емдік жаттығулар жасау, таза ауада серуендеу қажет.
Сіз жаңалықтар туралы не ойлайсыз