Бүгін нефролог-дәрігерлер кәсіби мереке «Нефролог күнін» атап өтіп жатыр.
Дәл осы күні мыңдаған адамның өміріне араша болған, қазіргі уақытта Алматы Орталық қалалық клиникалық ауруханада нефрология, гемодиализ және ЭКД бөлімінің меңгерушісі – Шурина Ақмарал Жусупбекқызы жайлы айтып бергіміз келеді. Ол кәсібилігі мен өз қызметіне деген адалдығы арқасында науқастарға сауығып кетуге және жаңа мүмкіншілікке үміт сыйлап, өмірін өзгерте алатын нағыз өз ісінің маманы.
Ақмарал Жусупбекқызы – кең жүректі және терең білімі бар, нефрология саласында 20 жылдан астам уақыт қызмет етіп келе жатқан дәрігер.
Ол кісінің дәрігерлік жолы Астана қалалық Мемлекеттік медицина академиясынан бастау алады. Онда Ақмарал Жусупбекқызы өзінің сәтті қызметтік өмірінің негізіне айналған бастапқы білімін алған. Нефрология бөліміндегі алғашқы жұмыс күнінен бастап-ақ, ол жоғары кәсібилігі мен науқастарға деген қамқорлығымен ерекшеленді.
Ақмарал Жусупбекқызының тәжірибесіндегі ең жарқын жағдайдың бірі гломерулонефрит пен бүйрек жеткіліксіздігінің салдарынан ауыр жағдайды бастан өткерген жас әйел болды. Дәрігердің қажырлы күш-жігері мен ұзақ емдеуінің арқасында науқас толыққанды өмірге оралып, толық қалпына келді. Бұл іс әділ көмек пен кәсіби көзқарас нағыз ғажайыпқа әкелетінін дәлелдеді.
Ақмарал Жусупбекқызы айтқандай, бүгінде бүйрек аурулары жасарып, алуан түрлі болып келеді.
Ол аутоиммунды аурулармен, қант диабетімен және басқа да ауыр патологиямен бетпе-бет келіп, науқастарына қиындықты жеңуге және салауатты өмірге оралуға көмектеседі.
Науқастар Ақмарал Жусупбекқызына кәсібилігі, зейіні мен қамқорлығы үшін алғыс білдіреді. Оның жұмысқа деген жауапкершілігі, науқастардың жағдайын күнделікті бақылауы және терең білімі оны көптеген адамдар үшін таптырмас маман етсе, оның дұрыс диагноз қоюы және тиімді емдеу қабілеті оны көптеген адам үшін нағыз қаһарман етеді.
Бұл туралы Орталық қалалық клиникалық аурухананың науқастарының бірі Махинур Ванькова былай дейді:
«Мен мұнда өте ауыр жағдайда келген болатынмын. Мұнда түскенде бір түн жан сақтау бөлімінде болдым. Содан кейін нефрология бөліміне көтерді. Сол кезде енді өліп кетермін деп ойладым. Жағдайымның өте ауыр болуына байланысты бөлімшеде 15 күн жаттым. Мені бұл жерде аяғыма тұрғызды. Мен бұны күтпеген едім. Бүгін маған эндокринолог келіп мені танымай қалды. Мен стационарға келіп түскенде қандай едім, қазір қандаймын. Ақмарал Жусупбекқызын алғаш көргенде-ақ ол кісінің сауатты, өз жұмысына, науқастарға өте ұқыпты екенін байқадым. Күн сайын әр палатаға кіріп науқастардың жағдайы біліп, оларға ыңғайлы ма деп сұрап кетеді. Оның асқан жауапкершілігіне таң қалдым. Мен ол кісіге зор денсаулық, толағай табыс тілеймін», — деп көзіне жас алды.
Маман емдеп аяққа тұрғызған науқас саны мыңнан асады.
Нефролог күні — пациенттердің өміріне күн сайын жарық пен үміт сыйлайтын осы көрнекті мамандардың еңбегін атап өтуге тамаша себеп.
Ақмарал Жусупбекқызын осы тамаша мерекемен құттықтаймыз және зор денсаулық, жаңа табыс пен амандық тілейміз.
Сіз жаңалықтар туралы не ойлайсыз