Алматы қаласы Жастар саясаты басқармасының қолдауымен «Алматы студенттер Альянсы» ҚҚ ұйымдастырған Алматы қаласының шығармашыл жастары арасындағы «JAS GALA» студенттік көктем шығармашылық байқауы өз мәресіне жетті. Бір айға созылған фестивальде қатысушылар вокал, хореография, мобилография, аспаптық орындау, театр бағыттары бойынша бақ сынаған. Жалпы жобаға 2,5 мыңнан астам студент қатысты.
– Алматы – жастар қаласы! Алматы қаласында 14 пен 35 жас аралығындағы 682 мыңнан астам жас тұрады. Оның ішінде 255 мыңнан астамы студенттер, 35 ЖОО және 83 колледж бар. Көріп тұрғанымыздай, қаламызда жастардың басым бөлігін студент жастар құрайды. Бүгінде Алматы қаласы Жастар саясаты басқармасы жастарды жан-жақты қолдау бойынша түрлі жобаларды жүзеге асырудамыз («IQ-ALA jastary», «BookVibe», Жас сарапшылар мен пікірсайысшылар клубы, «Тәуелсіздік ұрпақтары», «ALMA CUP»). Соның бірі дәстүрлі түрде өткізілетін шығармашыл студенттердің фестивалі – Jas Gala. Jas Gala жобасы студент жастардың шығармашылық қабілеттерін дамыту және қаламыздың талантты жастарын анықтауға бағытталған. Осы орайда аталмыш жобаға қатысып, жеңіске жеткен барша қатысушаларды шын жүректен құттықтаймын, — деді өз сөзінде Алматы қаласы Жастар саясаты басқармасының басшысы Қайыржан Меңдіғалиев.
«Алатау» дәстүрлі театрында өткен жабылу салтанатында әр номинация бойынша жеңіске жеткен қатысушылар мараптталып, үздік атанған жастар сахнада өз өнерлерін көрсетті. 1 айға созылған байқау нәтижесінде «Вокал» бағыты бойынша бас жүлдені Ж.Елебеков атындағы Республикалық Эстрада-Цирк колледжінің студенті Мұхтар Аружан, «Аспаптық орындау» бағыты бойынша Ж.Елебеков атындағы Республикалық Эстрада-Цирк колледжінің «Парасат» ансамблі, «Хореография» бағыты бойынша Әл-Фараби атындағы Қазақ ұлттық университетінің «Dance Zone 27» би тобы иеленді. «Театр» бағыты бойынша Т.Жүргенов атындағы қазақ ұлттық өнер академиясының «Нүкте» тобы, «Мобилография» бағыты бойынша Алматы Мемлекеттік Бизнес колледжінің студенті Бейбітұлы Ардақ жеңіске жетті.
«JAS GALA» жобасы қаламызда 2022 жылдан бастап өткізіліп, жастар арасында ерекше қызығушылыққа ие болған. Ұйымдастырушылардың айтуынша аталмыш жоба келесі жылы да жалғасын таппақ.
– Бүгін мінекей бір айдан астам уақыт бойы жүзеге асқан жоба өз мәресіне жетіп жатыр. Жүзден жүйрік мыңнан тұлпарлар шықты. Жылдан жылға аталмыш жобаға қатысуға ниет білдіруші жастардың саны көбейіп жатыр. «JAS GALA» жастар арасында әдемі дәстүрге айнлған жоба десем артық айтқаным емес. Барша жеңімпаздарды марапаттарымен шын жүректен құттықтаймын! — деді Алматы студенттер Альянсы» КҚ атқарушы директоры Жасұлан Бостандықұлы.
Айта кетейік, жобаның биылғы жүлде қоры – 7 500 000 теңгені құрады.
Сіз жаңалықтар туралы не ойлайсыз