Француз делегациясы Алматыдағы онкологиялық орталықта, сонымен қатар скрининг жүргізілетін емханалардың ішінде N4 және N23 қалалық емханаларда болды.
Жұмыс сапары аясында қонақтар маммолог, онколог, профилактика және әлеуметтік-психологиялық көмек бөлімі меңгерушілері, ЖТД, сәулелік диагностика, УДЗ және маммография мамандары, рентгенолог, рентген-лаборант, учаскелік медбике жұмысы және жабдығымен, сондай-ақ диагностиканың қалай жүргізілетінімен (мақсатты маммография, УДЗ, пункциялық биопсия) танысты.
Іс-шара барысында Франциядан келген зерттеушілерге «Тіркелген халық арасында қатерлі ісік ауруын ерте анықтау үшін скрининг» тақырыбында презентациялар көрсетілді.
Сүт безі ауруларын ерте диагностикалау қазіргі заманғы медицинаның өзекті міндеттерінің бірі болып табылады. Бүкіл әлемде сүт безінің түрлі патологиялары бар әйелдер санының тұрақты өсу үрдісі байқалады. Алматыда сырқаттанушылық көрсеткіші бойынша сүт безі қатерлі ісігі бірінші орында тұр. Өткен жылдың өзінде 728 жағдай анықталды. Алматы онкологиялық орталығының бас дәрігері Нұрсұлтан Избагамбетовтың айтуынша, қазіргі уақытта сүт безі қатерлі ісігінің бес жылдық өмір сүру көрсеткіші барлық кезеңде анықтауды ескере отырып 70% және одан да көпті құрайды. Ерте кезеңде анықталғанда бұл көрсеткіш 90%-ға дейін жетеді. Түрлі локализация кезінде 5 жылдық өмір сүру пайызы да әр түрлі, бірақ ауру неғұрлым ертерек анықталса, соғұрлым жақсы емделетіні анық.
Кездесу Қазақ онкология және радиология ғылыми-зерттеу институты мен Кюри институты (Франция) арасындағы Қазақстанда сүт безі обырын ерте диагностикалау және маммографиялық скрининг тиімділігін арттыру жобасын жүзеге асыру жөніндегі ынтымақтастық туралы меморандум аясында өтті.
«Сүт безі обырын ерте анықтау бойынша скринингпен айналысатын мамандар үшін француз тарапы өкілдерінің біздің жұмысымыз туралы пікірін білу, скрининг сапасына мониторингті жақсарту бойынша ұсыныстарын тыңдау қызықты болды. Кюри институтымен ынтымақтастық Қазақстанда сүт безі обырын ерте анықтауға арналған скрининг сапасын арттыруға әкеледі деп сенеміз», — дейді АОО бас дәрігерінің орынбасары Жанна Кужаева.
Жоба өңірлері ретінде Алматы қаласы, Алматы және Жетісу облыстары анықталды.
Қазақстанда скринингтік тексерулер мемлекеттік бағдарлама болып табылады. Бағдарлама сүт безі обырын, жатыр мойны обырын, тоқ ішек пен тік ішек обырын ерте анықтау үшін онкологиялық скринингті қарастырады, өйткені бұл қатерлі ісіктердің жиілігі жоғары.
Скрининг тіркеу орны бойынша емханада – міндетті әлеметтік-медициналық сақтандыру аясында тегін жүргізіледі.
Есіңізде болсын — ерте диагноз өміріңізді аман алып қалады!
Сіз жаңалықтар туралы не ойлайсыз