Қазақ эстрадасың жарық жұлдызы, әнші Медеу Арынбаев «Ең алғашқы…» бағдарламасына берген сұхбатында, осыдан он жыл бұрын қайтыс болған жары Айгүліне арнап жазған сағыныш әнін орындады, деп хабарлайды Qazaqpress «Еуразия» бірінші арнасына сілтеме жасап.
«Айгүлімнің ғұмыры қысқа болса да өте жарқын өмір сүрді. Мен оны бір көргеннен, бұл менің адамым деген сезім болған. Бірақ бұл қыздың басы бос па екен деген қоқыныш жылт еткен. Мұндай сұлудың маған бұйыруы мүмкін бе, мен оған лайықпын ба деген ойлар да болды. Жаратқан сәтін салып, бізді табыстырды. Өте бақытты ғұмыр кешіп жаттық. Аяқ астынан бір кеште басын ұстап жатып қалды да біраз уақыттан кейін есін білмей талып қалды. Сол қалпында 5 күн жатып, алтыншы күні дүние салып кете барды. Айгүлім менің өмірімдегі ең алғашқы таза, пәк махаббатым. Сүйіктімнің қысқа өмірінде беріп кеткен азығы маған бір ғұмырға жетеді екен. Себебі ол үнемі айтып отыратын «…Біздің балалар ешқашан біздің көрген қиындықтарымызды көрмейді, ешқашан мұңаймайды, жыламайды!»-дегені менің жадымнан кетпейді. Сол себепті де мені өмір сынағанымен менің сынып қалуға қақым жоқ!»,-деді Медеу Арынбаев.
Ұл мен қызын жалғыз тәрбиелеп отырған өнер адамы өзінің жанын ұғатын, балаларының жағдайын түсінетін, жүрекке жақын келер бір ару кездесіп жатса, қайта үйленуге дайын екенін де ашып айтты. Тіпті бұл тақырыпты соңғы жылдары әншінің балалары да ашық айтатын болған екен.
«Біздің анамыз өте жақсы адам еді. Ол өте білімді болды, екі дипломы бар, ағылшын тілін жетік меңгерген мықты маман еді. Ол бізге өмір сыйлағандықтан біздің өміріміздегі ең қымбат жан болып қала берері сөзсіз. Бірақ әкеміз де өте жақсы адам болғандықтан оның бақытты болғанын қалаймыз. Егер өз махаббатын кездестіріп жатса, үйленуіне қарсы емеспіз. Бізді бағып-қағып, қас қабағымызға қарап, осынша жасқа дейін көңілімізге қаяу түсірмей келе жатқандығы үшін өте қатты жақсы көреміз»,-деді әншінің қызы – Даяна Арынбаева.
Лирик әнші Медеу Арынбаев сахнадан үнемі махаббаттың мәңгі екенін жырлап келеді. Әріптестері мен жора-жолдасының арасында бір беткейлігі мен бір сөзділігінің арқасында өте жоғары құрметке ие. Ол жалғыздықтың тек жаратқанға жарасарын біледі. Сәтін салса бақытты болуға да талпынбақ. Бірақ…
«Маған тек ас әзірлеп, бала-шағамды күтіп отыратын адам керек емес. Тек жүрек қалауымен болу керек. Тәуекелге сала алмаймын. Өзім тұрақтылықты жақсы көретін адам болғандықтан, соңғы он жылда махаббаттың мәңгілігін жырлап келемін. Қайткенде де махаббат сезімінің мәңгі екенін дәлелдегім келеді. Мен өте бақытты адммын себебі Айгүлім маған осындай ұл мен қызды сыйлап кеткен. Бұдан артық бақыт бар ма?», – деп әнші қысқа қайырды.
Сіз жаңалықтар туралы не ойлайсыз