Наурыз айында мемлекет басшысының тапсырмасы бойынша жастардың кәсіпкерлік бастамаларына қолдау көрсету үшін жеңілдетілген шағын несие беру жоспары іске асуда. Жобаға 2023 жылы 29 млрд теңге бөлінді, деп хабарлайды Qazaqpress Bizmedia.kz-ке сілтеме жасап.
Еңбек және халықты әлеуметтік қорғау вице-министрі Олжас Ордабаев бұл қаражатқа 5,8 мың жас жеңілдетілген несие алатынын хабарлады.
Мұндай шағын несиелер өскелең ұрпақ пен олардың бизнесін қолдаудың жаңа құралы. Несие 21 мен 35 жас аралығындағы азаматтарға 2,5% мөлшерлемемен 5 жылға дейін немесе мал шаруашылығына алатын болса, 7 жылға дейін беріледі. Сол уақыт ішінде негізгі қарызын өтеу үшін уақыт беріліп, сыйақыға қатысты жеңілдіктер қарастырылған.
«Оның ұзақтығы шағын несие мерзімінің 1/3 бөлігінен аспайды. Несиемен берумен Аграрлық несие корпорациясы айналысады. Бұл ұйымның несие беруде тәжірибесі мол және әр өңірде филиалдары бар», – деді Олжас Ордабаев.
Сондай-ақ 2023 жылы жалпы 9 000 адам әртүрлі құралдардан грант түрінде қолдау алады. Олар халықтың әлеуметтік осал топтарына беріледі. Оның мөлшері 400 АЕК, яғни 1,3 млн теңгені құрайды.
Осы аптада алғашқы грант беру тізімі бойынша құжат қабылдау уақыты басталды. Сәтті өткен үміткерлер жалпы 2600 грант ала алады деген болжам бар. Сонымен қатар, осы жылы кемінде төрт грант беру бойынша іріктеу өткізу жоспарлануда. Құжаттар онлайн түрде қабылданады.
Discussion about this post