Танымал заңгер Олег Чернов пен оның әйелі – адвокат Анна Дмитриевич Алматыда соққыға жығылғанын айтты, деп хабарлайды Qazaqpress Bizmedia.kz-ке сілтеме жасап.
Оқиға ақпанның 10-нан 11-іне қараған түні Алматыдағы бір мейрамхананың жанында орын алды.
Ерлі-зайыптылар такси шақыртып, көлікке қарай беттеп келе жатқанда, кенет куәгерлер жүгіріп жетіп, ер адам соққы астына алған қызға көмектесуді өтінді.
Адвокаттар соққыға жығылды – Черновтың нұсқасы
«Шақыртқан көлігіміз күтіп тұрған жерден алыс емес еді. Қарасақ, расында бір жігіт қызды ұстап тұрып ұрып жатқанын көріп жүгіріп келдік, ол бізден көмек сұрай бастады. Сосын біз оған қызды жіберсін, доғарсын деп айғайлай бастадық. Бәрі содан басталды.
Алдымен ол мені бір ұрды да мен құлап қалдым. Орнымнан тұрып жатқан жерімнен жүгіріп кеп тағы ұрды. Есімді жиған соң Аннаның (әйелі) жерде жатқанын көрдім. Куәгерлер бізге бейнежазба жіберген соң ғана ол оның жағынан салып жібергенін көрдім, ол құлап қалыпты. Ал, менің басымнан ұрып, тепкілей бастады. Кейін видеодан ғана көрдім қалай басымнан тепкенін. Содан кейін полиция келді, олар барлығын ұстап алып кетті», – деді Олег Чернов.
Алматыда адвокаттар соққыға жығылды. Күдіктінің әкесі Дәулет Тұрлыханов не дейді?
Ерлі-зайыптылар өздерін ұрып жыққанның әкесі грек-рим күресінен Қазақстанның еңбек сіңірген жаттықтырушысы Дәулет Тұрлыханов екенін айтты.
Тілшімен сұхбаттасып отырып, Дәулет Тұрлыханов бұл расымен өзінің ұлы екенін растады. Сол күні түнгі клубтардың бірінде бір қызбен болыпты.
«Иә, бұл менің ұлым. Сол күні ол қызымен бірге болған. Ол кәмелет жасқа толды. Құқық қорғау органдары өздері шешімін жасар. Әрине, ұлымның төбелескенін қолдамаймын. Бірақ адвокат жалдап, онда өзі не болғанын анықтайтын боламыз», — деді Дәулет Тұрлыханов.
Адвокат қандай жарақат алды?
Бұл арада Олег Чернов басынан қатты жарақат алғанын, қабырғасының және иегінің сынғанын хабарлады. Ал, әйелін қазір жағы мен иығының ауыруы мазалап жүр екен.
«Қазіргі уақытта судмедэкспертиза мен тергеу жұмыстары жүргізілуде. Іс «Бұзақылық» бабы бойынша тіркелді. Бірақ, денсаулығыма орташа дәрежедегі зақым келгендіктен, классификацияны қайта өзгертер деп ойлаймын. Кейін тергеу бәрін анықтап, процессуалдық шешімдер қабылдайды», – деп түйіндеді Олег Чернов.
Полиция не дейді?
Алматы Ішкі істер департаменті бұл оқиға ҚР Қылмыстық кодексінің 293-бабы «Бұзақылық» бойынша сотқа дейінгі тергеп-тексерудің бірыңғай реестріне тіркелгенін хабарлады.
Қылмыстық іс бойынша алғашқы тергеу жұмыстары жүргізіліп, экспертиза жариялады.
Күдікті әскери адам болғандықтан, қазір қылмыстық іс бойынша дұрыс шешім тағайындау үшін, барлық материалдар қалалық прокуратураға жіберілді.
Сіз жаңалықтар туралы не ойлайсыз