26 қарашада ақын Ануар Омардың құрметіне орай «Бір тамшы ғұмыр» атты еске алу іс-шарасы өтті.
«Avangard» ақындар тобының мүшесі Абай Қапабаев Ануар Омардың «нашу встречу осыпал снег…» деп басталатын өлең шумақтарымен іс-шараның басын ашты.
Ануар Омардың «Шаги проникновения» атты кітабынан бір-екі өлеңінен сусындаған аудитория назарына іс-шараға қатыса алмаған жандардың өз қолдарымен жазылған Ануар жайлы естеліктері ұсынылды. Естеліктердің бірінде:
«Былағат сөз қосып, асты-үсті жаза беретін «кейбір» жалған ақындар бар қазір. Ал, елорданың құрылуына куә болған Ануар сынды нағыз ақындар аз», – деп жазылған.
Одан соң сөз кезегі Дина Оразға берілді. Дина Ораз автор кітабында жарияланған «Кітаптар философиясы» атты өлеңін оқып, Ануардың өмірбаянын толықтыру үшін қысқаша презентация дайындап, слайд-шоу ұйымдастырды.
Презентация үстінде Дина Ануармен бірге өткізген іс-шаралары мен түрлі өмірлік оқиғаларын еске алып, жұбанды.
Қайтқан адам жайлы жаман айтпайды дейді, алайда іс-шараға қатысқандар Ануардың шынайы қырын бүйір бүкпей турасынан айтып, ақкөңілдігін, сезімталдығын және кітапқұмарлығын, кітаптан бөлек гүлден нәзік жандарға деген әлсіздігін де әсем түрде жеткізе білді.
Тұлға жайлы айтқанда оның үлгі тұтатын кісілерін де ұмытуға болмайды. Себебі, адамның пірі туралы ақпарат өзінің тұлғасы жөнінде де біраз айтып береді.
Сондықтан Елизавета Геттингер Ануардың өлеңінен соң екеуінің де ортақ сүйікті ақыны – Олжас Сүлейменовтың да өлеңін құлақ құрышын қандырып, оқып берді.
Ал, Азамат Байғалиевтің пайымдауынша, Ануар расымен де өз заманының адамы емес болған көрінеді.
«Негізі Ануар орта дәуірдің Парижінде туылу керек еді. Естеріңізде болса ежелгі шегетін трубкалар бар ғой, соны аузына қыстырып алып, шығармашылықпен ғана айналысып отыратын адам ғой ол, әттең! Елорданы бәрі кілең шенеуніктер қаласы дейді. Жоқ, ол олай емес! Астана – нағыз шығармашыл адамдардың қаласы. Қайда қарасаң барлығы да шетінен бір-бір ақын, бір-бір жазушы, прозаик. Өкінішке қарай, бұл шығармашыл адамдар немен айналысса да шығармашылықпен айналыспайды. Қажеттіліктен туындаған жұмыстың соңынан жүгіреді, амалы қанша? Әйтпесе Ануар – кәсіби ақын. Өз саласының, сөз арнасының шебері еді. Бірақ, ең қызығы, қанша жерден қаланың күйбең-тіршілігі қиын болғанмен, Ануар қыр мен таулар асқан даладан көрі шаң мен түтін басқан қаладан көбірек шабыттанатын. Себебі, ол шулы қаланың түбінен оның шуағын көретін», – деді ол.
Сонымен қатар Оразбаева Наркес (Inst: @narkesus) Ануарға арнап шығарған авторлық әнін мұңлы сарынмен шырқап берді.
Іс-шара «Astana Polytechnic» жоғары колледжі студенттерінің орындауында А.Омардың өлең үзінділері оқылып, кең дастарханмен қорытындыланды.
Қатысушылар мен автор туыстары Ануар Омардың құрметіне орай ұйымдастырылған кештің жетекшісі Дина Оразға үлкен алғысын білдіріп, барша ат салысқан жастарға баталарын жаудырды.
Сіз жаңалықтар туралы не ойлайсыз