ҰЭМ басшысы ресейліктердің эмиграциясы Қазақстан экономикасына тигізетін оң және теріс әсерлері жайлы айтып берді, деп хабарлайды Qazaqpress Bizmedia.kz-ке сілтеме жасап.
Қуантировқа бұның ел үшін жақсы және жаман жақтарын талдап беруді сұрады
Әлібек Қуантиров ресейліктер Қазақстанға тек уақытша келгенін айтты. Ал қыркүйек айының басында республикаға келгендердің басым бөлігі Қазақстанды шекаралық транзит ретінде пайдаланып, өзге елдерге ұшып кеткен болатын.
Кейбір көшіп келгендер, оның айтуынша, елде тұруға сол қалпы рұқсат алмаса, көп дегенде 90 күн ғана ел ішінде жүре алады.
«Теріс әсеріне келер болсақ, мен әлі ол туралы айта алмаймын. Қазақстан қалай дегенмен өзінің қонақжайлылығын көрсетті», – деді Әлібек Қуантиров.
Пайдасы – IT секторындағы бәсекелестіктің дамуы
«Жағымды жақтарына келсек, егер біз жоғары біліктілікті қажет ететін салаларды қарастырсақ, бұл [жағдай] біздің азаматтардың да жұмыс сапасын арттыру үшін салауатты бәсекелестікті тудырады. Ресейден, Беларусьтен, Украинадан IT мамандардың [көшіп] келгені – жалпы біздің экономиканың, атап айтқанда цифрлық саланың дамуына оң әсерін тигізді», – деді министр.
Ресейліктердің эмиграциясы сауда балансы мен тұтынушылық сұранысқа оң әсерін тигізді.
«Олар келіп, қызметтер мен тауарларды осында тұтынуда. Біз қызметтеріміз бен өнімдерімізді Ресей Федерациясына экспорттамай-ақ осында сата аламыз деп айтуға болады», – деп түйіндеді ҰЭМ басшысы.
Сіз жаңалықтар туралы не ойлайсыз