Президенттікке кандидат Қасым-Жомарт Тоқаевтың Республикалық қоғамдық штабына әлемнің 37 елінен 44 халықаралық бұқаралық ақпарат құралының өкілі келді.
Олардың қатарында АҚШ, Канада, Ұлыбритания, Испания, Бельгия, Австрия және т.б. елдерден келген журналистер бар.
«AMANAT» партиясының Атқарушы хатшысы Асхат Оралов оларды үгіт-насихат және талдау орталықтарының, кандидаттың қоғамдық қабылдау бөлмесінің, медиа-штабтың, сенімді өкілдердің жұмысын үйлестіру орталығының, байқаушылар штабы мен арнайы жастар алаңының жұмысымен таныстырды.
«Бұл функционалды, жоғары технологиялық орталық сайлау науқаны кезінде белгілі бір шешімдерді жылдам қабылдауға мүмкіндік берді. Бір ай бойы, тәулік бойы Қасым-Жомарт Тоқаевты қолдайтын халықтық коалицияға кіретін ұйымдардың өкілдері осында бірге жұмыс істеді. Штаб жұмысы мөлдірлік, жариялылық және заңнамалық нормаларды сақтау қағидаттарына қатаң сәйкес ұйымдастырылды», — деді Асхат Оралов.
Кездесу қорытындысында Республикалық қоғамдық штаб мүшелері шетелдік БАҚ өкілдеріне арнап брифинг өткізіп, онда сайлау науқаны аясында атқарылған жұмыстар туралы айтып берді.
Жалпы, үгіт-насихат науқаны кезінде Қасым-Жомарт Тоқаевтың жақтастары 42 қала мен 5000-нан астам ауылды аралады. Олар өткізген 24 мың үгіт-насихат іс-шарасына 3 миллион сайлаушы қатысты. Кездесулер барысында азаматтардан 40 мыңнан астам ұсыныс пен тілек жиналды.
Discussion about this post