Бүгінгі таңда Youtube кеңістігінің бас беттерінде орналасатын «Recommendations» (Ұсыныстар) контенттерінің арасында жиі әлемдік және мемлекеттің ішкі трендтеріне қатысты түрлі алаяқтық контенттер жариялануда, деп хабарлайды Qazaqpress.
Қыркүйек айында біз «ҚазМұнайГаз» компаниясына байланысты әлеуметтік желілерде, Play Market, AppStore және т.б. интернет кеңістігінде таралған жалған ақпараттар жайлы жазған едік. Бірақ, алаяқтар тек алға қарайды екен. Қазіргі таңда киберқауіпсіздік пен криптовалюта мәселесі өзекті тақырыптардың бірі. Мәселен, 26-27 қазанда Алматы қаласында өткен PLUS-Forum салтанатты іс-шарасында киберқауіпсіздік пен экономиканы цифрландыруға байланысты тақырыптар баяндалған болатын. Оған қоса, тәуелсіз сарапшылардың пайымдауынша, алдағы онжылдықтарда ІТ мамандары тапшы болу мүмкін. Сондықтан, қазір киберқауіпсіздік пен ІТ тақырыбы жиі талқылануда.
Өзекті тақырып жұртты баулайды
Фейктердің табиғаты жөнінде сөз қозғағанымызда олардың негізгі қаруы – жаһандық жаңалықтардан хабардар болып, ақпаратпен манипуляция жасау екенін айтқан едік. Кейбір тақырыптар қайта айналып, жаңа реңмен аудиторияға ұсынылу мүмкін, ал кейбір тақырыптардың мерзімі жоқ және өзектілігі ұзақ уақытқа дейін өшпейді. Бүгінгі таңда жиі сөз етілетін тақырып – киберқауіпсіздік және криптовалюта.
Youtube фильтрациясы нашар жұмыс істейді екен
Mozilla жүргізген зерттеу нәтижесі бойынша, YouTube алгоритмдері көрермендерге жалған бейнелер мен орынсыз деп санайтын контенттерді ұсынады екен, ал сенгіш қолданушылар алаяқтардың қармағына ілініп қалып жатады. Зерттеу нәтижесіне сүйенсек, пайдаланушыларға ұнамаған бейнелердің 71% видео-платформаның алгоритмі өзі ұсынған екен. Mozilla Foundation YouTube алгоритміне қатысты жүргізілген зерттеу нәтижелерін жариялап, зерттеу жүргізу үшін арнайы RegretsReporter деп аталатын браузерлерге арналған кеңейтілген қосымшаны шығарған болатын. Зерттеуге 37 мың ерікті қатысқан. Олар қосымшаны смартфондарына жүктеп алып, 2020 жылдың шілдесінен 2021 жылдың мамырына дейін 10 ай бойы Youtube-пен қолданып жүрді.
Көп ұзамай зерттеу нәтижесі бойынша, YouTube алгоритмдері әлі де тиімді жұмыс істемейтініне көзі жетіп, пайдаланушыларға жалған ақпараты бар контенттерді, сондай-ақ орынсыз деп саналған контенттерді ұсынуды жалғастыруда деген байламға келді.
YouTube ұсынған контенттер арасында платформаның ережелерін тікелей бұзған контенттер де болыпты. Mozilla мәліметі бойынша, кейін YouTube көрермендер орынсыз деп белгілеген 200-ге жуық контентті жойған болатын, бірақ оған дейін бұл бейнелер шамамен 160 миллион қаралым жинап үлгеріпті.
YouTube компаниясының өкілдері алгоритмдердің жұмысын дамытуды жалғастыратынын мәлімдеді. Ол үшін 2020 жылы компания 30 түрлі жаңа өзгерістерді енгізген болатын. Компанияның қауіпсіздік бақылау тобының пайымдауынша, Youtube-тің автоматтандырылған жүйесі платформа ережелерін бұзатын бейнелердің 94% анықтайды екен және көпшілігін 10 рет қаралмайынша өшіріп тастап отырады.
Қорытынды
Уақытша шара ретінде Mozilla пайдаланушыларға қаралым және іздеу тарихын (history) үнемі бақылап, өздеріне тазалап отыруға кеңес берді. Сөйтіп олар «Recommendations» ұсынылатын контенттерге теріс әсер ететін тақырыптарды реттеп, лентасын тазалап отыра алады. Тоқетерін айтқанда, медиа-сауаттылығымызды арттырайық!
Сіз жаңалықтар туралы не ойлайсыз