Алматы бюджетінен әлеуметтік маңызы бар өнімдердің бағасын бір қалпыда сақтау үшін 11 млрд теңге бөлінді – деді қала әкімі Бақытжан Сағынтаев, деп хабарлайды Qazaqpress Zakon.kz-ке сілтеме жасап.
— Әлеуметтік маңызы бар өнімдердің бағасын қалыпты деңгейде ұстап тұру үшін, жүйелі шаралар жалғасады. Бұған жергілікті бюджеттен 11 миллиард теңге бөлінді. Бөлінген қаражат есебінен 19 Magnum сауда-орталық желісі мен 12 Toimart сауда-орталық желісінде әлеуметтік маңызы бар өнімдер мен тауарлардың барлығы төмендетілген бағамен сатылуда. Орта есеппен екі желіде көкөніс бағасы базар бағасынан 30-50 пайызға, ет өнімдері 10-15 пайызға, азық-түлік тауарлары 10-30 пайызға төмендетілді – деді Бақытжан Сағынтаев.
Оның айтуынша, «Көк базар», «Ақ-Бұлақ», «Оптовка», «Сарыарқа», «Тастақ», «Тау-Самал», «Алматы-1», «Түрксіб» жәрмеңкесі сияқты жеті азық-түлік базарында әлеуметтік дүкендер жұмыс істейді.
— Көкөніс өнімінің сауда орындарында базар бағасынан 15,-2 есе төмен бағамен сатылуда, — деді Бақытжан Сағынтаев
Әкім Алматының қай жерінде 2050 теңгеге сиыр етін сатып алуға болатынын да айтты.
— «Жұлдыз», «Орбита», «Тау-Самал», «Арыстан» және «Тастақ» секілді бес базарда ет сататын дүкендер іске қосылып, сиыр етінің келісі 2050 теңгеден сатылуда, — деп қорытындылады Бақытжан Сағынтаев.
Бұған дейін мегаполис әкімі Алматыда екі метро стансасы қашан іске қосылатынын, тәртіпсіздіктен зардап шеккен кәсіпкерлерге қалай көмектесетінін айтқан болатын.
Сіз жаңалықтар туралы не ойлайсыз