Балалар біздің болашағымыз, олардың денсаулығы — біздің ортақ қамымыз.
Алау қалалық оңалту орталығының педиатры Марина Жанабаева балаларда жиі кездесетін аурулар туралы айтып берді.
Маманның айтуынша, балалар ЖРВИ ауруымен жиі ауырады, демікпе немесе жүрек-қан тамырлары аурулары сияқты басқа да медициналық проблемалары бар балалар үшін бұл ауру қауіпті болуы мүмкін.
Сондай-ақ, балалар отит, аллергиямен жиі ауырады.
— Аллергия белгілеріне мұрыннан су ағу, қышу және теріде бөртпенің болуы жатады. Аллергияны емдеу кезінде антигистамин және басқа да дәрі-дәрмек қолданылуы мүмкін. Демікпе ауруы балаларда да кездеседі. Балалар үшін демікпе қауіпті, себебі ол тыныс алудың шектелуіне және оттегі ашығуына әкелуі мүмкін, бұл ауыр асқынуларға, соның ішінде астматикалық ұстамаға әкеліп, ауруханаға жатқызуға себеп болады, — дейді сарапшы.
Демікпесі бар балаларда пневмония және бронхит сияқты аурудың даму қаупі жоғары. Сонымен қатар, демікпе физикалық белсенділікті шектеп, баланың өмір сапасына кері әсер етуі мүмкін. Сондықтан асқынудың алдын алу үшін балалардағы демікпені уақтылы диагностикалау және емдеу маңызды болып табылады.
Дәрігердің айтуынша, жыл сайын қант диабетімен ауыратын науқас саны артып келеді.
— Соңғы кездері балаларда 2-типті қант диабеті дене салмағының артық болуы аясында жиі анықталады, бұл жеңіл көмірсуды көп тұтынуға және физикалық белсенділіктің жеткіліксіздігіне тікелей байланысты. Баланы 2-типті қант диабетінен оңай сіңетін көмірсуды, әсіресе қантты газдалған сусынды, фастфудты, жартылай фабрикатты тұтынуды барынша азайтып, дене белсенділігін арттыру және дұрыс тамақтану, күн тәртібі мен ұйқыны сақтау арқылы қорғауға болады, — деп қорытындылады Марина Жанабаева.
Сіз жаңалықтар туралы не ойлайсыз