Оңтүстік астанадағы Шұғыл медициналық жәрдем ауруханасы дәрігерлері 59 жастағы әйелдің иық буынына эндопротез орнатты.
Аурухананың №1 травматология және ортопедия бөлімшесі меңгерушісі Медет Жанысовтың сөзіне сүйенсек, шеміршектегі өзгерістер денсаулыққа қауіпті. Себебі ол адамның жүріс-тұрысын қиындататын ауруларға, мысалы артрозға әкеп соқтырады. Жалпы, адам баласы иық буындарын өте көп қолданады. Соның арқасында біз күн сайын мыңдаған қимыл жасаймыз.
«Иық буыны артрозы немесе омартроз – шеміршек тінінің желінуінен қимыл-қозғалыс шектеліп, ауырсыну сезімін тудыратын ауру. Омартроз сүйек сынғаннан кейін немесе ревматоидты артрит сынды ауру пайда болған кезде күшеюі мүмкін», — дейді Медет Жанысов.
Жарақат салдарынан пайда болған артроздың соңы тіннің жыртылып, созылуына, иықтағы қан айналымының бұзылуына әкеп соқтырады. Дер кезінде емдемесе пациент мүгедек болып қалуы мүмкін.
Шұғыл медициналық жәрдем ауруханасына портал арқылы түскен 59 жастағы пациент міндетті әлеуметтік медициналық сақтандыру арқылы эндопротездеу операциясы жасалды.
Пациент 2012 жылы жарақат алған. Оң жақ иығының жоғарғы жағына ота жасалып, ұзақ уақыт бойы оңалту емін қабылдаған. Алайда араға бірнеше жыл салып науқастың оң жақ иығында буын артрозы пайда болған. 1,5 сағатқа созылған операция сәтті өтті, дейді дәрігер. «Иық буындарына да эндопротез орнатуға болады. Сол арқылы иықтың негізгі атқаратын қызметі қалпына келеді. Мұндай операциялар кез-келген қимылдан қолы қатты ауыратын пациенттер үшін таптырмас әдіс», — дейді Медет Жанысов.
«Оң қолың істемесе қиын екен. Мені мүгедектіктен сақтап қалған дәрігерлерге мың алғыс», — дейді пациент.
Сіз жаңалықтар туралы не ойлайсыз