Ресей Федерациясы Ішкі істер министрлігінің сайтында Дмитрий Давыдов есімді азамат іздеуге салынды деген ақпарат пайда болды. Ақпарат «Олимп» букмекерлік кеңсесінің бұрынғы иесі жайында, деп хабарлайды Qazaqpress Экспресске сілтеме жасап.
ІІМ ақпарат базасында ер адам жайлы тек 1981 жылы Қазақ КСР-де туғаны жайлы жазылған, ал аяқталмаған қылмыстық іс іздеуге негіз болды дейді.
Ресейлік БАҚ оның іздеуге салынғанын «Ресейді дамытудың 20 идеясы» атты жобасымен байланыстырады. Өйткені, жоба авторы Давыдов еді. Жоба ірі федералды жаңалық порталдары мен әлеуметтік желілерде жарнамаланған болатын.
Сонымен қатар, 16 желтоқсанда Давыдов шетелдік агенттер тізіміне қосылды. Алайда, бұл Ресейді дамыту жолдарын іздеп жүрген кәсіпкердің бейнесіне қайшы келеді.
Айта кетелік, Давыдов Қазақстанда да, ұзақ уақыт бойы, шамамен 2020 жылдан бері іздеу үстінде. Ресми деректерге сәйкес, Давыдов белгілі бір Анарбек Жауыровпен бірігіп ұйымдасқан қылмыстық топ құрған. Ол «Олимп» букмекерлік кеңсесінің атымен жамылып, заңсыз құмар ойындармен айналысқан.
2021 жылдың маусымында «Олимп» ісі бойынша сот отырысы өтті, айыпталушылар 5 жылдан 8,5 жылға дейін бас бостандығынан айырылды, бірақ Давыдов пен Жауыровқа Фемиданың қолы жете алмай, олар қашқындар тізіміне енгізілді.
Сөйтiп, Қазақстанның сот төрелiгiнен жасырынып жүрген кәсiпкер Ресейде iрi медиажобаны қолға алыпты. Ал, бұл қалай қолынан келгені үлкен сұрақ.
Еске сала кетелік, «Олимп» букмекерлік кеңсесі 2020 жылдың қаңтарынан бері жұмысын тоқтатқан еді.
Сіз жаңалықтар туралы не ойлайсыз