№36 Қалалық емхана бас дәрігерінің орынбасары Венера Тохтахунова қала тұрғындарының қай санатына міндетті әлеуметтік медициналық сақтандыру аясында стоматологиялық қызмет және оның қандай түрлері көрсетілетіні туралы айтып берді.
Маманның айтуынша, МӘМС аясында жоспарлы және шұғыл стоматологиялық көмекті: жүкті әйелдер; балалар ала алса, шұғыл стоматологиялық көмекті: жас ерекшелігіне қарай зейнеткерлер, ҰОС ардагерлері және оған теңестірілген адамдар; «Алтын алқа» және «Күміс алқа» төс белгісімен марапатталған көпбалалы аналар, I, II, III топ мүгедектері; ерекше мұқтаждықтағы балаларды күтетін және бала кезінен І топтағы мүгедекке қарайтын жұмыссыздар; атаулы әлеуметтік көмек алатындар; ерекше аурушаңдықпен есепте тұрған пациенттер ала алады.
Стоматологиялық көмектің шұғыл жағдайлары: терінің, тері асты тінінің жіті бактериалдық инфекциясы; абсцесс, ірің, шиқан секілді бет-жағының тістен болмайтын жіті асқыну аурулары; остеомиелит; сырт жағынан тісті жұлу және көмекті тек стационарлық жағдайда көрсетуге болатын басқа да жайлар.
«Жедел көмек пациенттің өміріне қауіп төндіретін созылмалы және жіті жағдайларда: пульпит; периодонтит кезінде; бет-жақ жарақаты, мысалы, тістің сынуы немесе шығып кетуі; бет-жақтың тістен, құлақтан болатын және болмайтын асқынған аурулары; стоматит; жіті аурушаңдық кезінде; шұғыл емделу кезінде шұғыл араласуды қажет ететін кезде көрсетіледі», — дейді Венера Тохтахунова.
Маман пациент медициналық ұйымды еркін таңдауы арқылы стоматологиялық көмек ала алатыны туралы да айта кетті, ол үшін учаскелік дәрігердің жолдамасы қажет емес. Қормен келісім жасаған жеке стоматологияны таңдауға болады, немесе өз емханасының стоматологиялық кабинетіне жүгінсе болады.
«Бейінді саладағы дәрігерлердің көмегі, КТ/МРТ қызметі, рентген және диагностиканың басқа да түрлері емдеуші дәрігердің жолдамасы бойынша сақтандырылған азаматтарға көрсетіледі. Ол аурудың жағдайын, оның шағымдану себебін, анықталған симптомдарды зерделеп біледі. Сәйкес көрсеткіштер болған кезде дәрігер КТ, МРТ және басқа зерттеуден өту үшін жолдама береді», — дейді маман.
Егер емхана өз бетімен аталмыш қызмет түрін көрсете алмаса, онда пациентпен бірлесе орындау келісімі бойынша басқа емханадан алуын қамтуы тиіс. Егер бірлесіп орындау келісімі ешкіммен жасалмаса, онда пациент аталмыш қызмет түрі бойынша қызмет көрсетушінің біріне жолдайды, төлем жолдамаға сәйкес көрсетілген қызмет қорытындысы бойынша автоматты түрде жасалады.
Егер пациентте жіті жағдай болса және де ол күте алмаған жағдайда, оған көмек бүгін, ертең не ең ұзақ дегенде бүрсігүні көрсетілуі тиіс. Жолдамада сәйкес белгі қойылып, пациент осы медициналық қызметтерді ала алады.
«Егер Сізде консультациялық-диагностикалық қызмет алуға қатысты сауалыңыз болса, немесе сол қызметтер көрсетілмесе, онда өз емханаңыздың Пациенттерді қолдау қызметіне жүгінуіңіз керек», — деп түсіндірді Венера Тохтахунова.
Сіз жаңалықтар туралы не ойлайсыз