Компания Ресей азаматтарын топ-менеджер ретінде жұмысқа алу себебін түсіндірді, деп хабарлайды Qazaqpress informburo.kz-ке сілтеме жасап.
Stopfake «Қазақмыс Корпорациясы» ЖШС компаниясы өзінің бір бөлігін ресейлік кәсіпкерлерге сатып отыр деген ақпаратты жоққа шығарды.
Күні бұрын кейбір бұқаралық ақпарат құралдары қазақстандық корпорация өз акцияларын сатып отыр деген ақпарат таратқан болатын. Дәлірек айтсақ, Жезқазған қаласының азаматы, белсенді, Берік Жағыпаров желтоқсан айында аталмыш компания үш Ресей азаматын бірден корпорацияның топ-менеджері ретінде жұмысқа алғанын айтқан болатын:
- Олег Копытов Қазақмыстың бас директоры қызметіне кірісті;
- Игорь Перетольчин – техникалық директор;
- Евгений Козак – ұйымдық даму және персоналды басқару жөніндегі директор.
Белсендінің пікірінше, компанияны ресейлік миллиардер Аркадий Ротенберг басқару мүмкін екен.
«Кейбір БАҚ-та және әлеуметтік желілерде Қазақмыстың іскерлік беделіне нұқсан келтіретін арандатушылық материалдар пайда бола бастады. Бұл жағымсыз ақпараттық қоқыстардың ешбір негізі жоқ және тек компания басшылығының беделін түсіруге, қазақстандық қоғамды тұрақсыздандыруға бағытталған. Қазақмыс компаниялар тобы әрқашан қазақстандық холдинг болып қала береді. Біздің басты міндеттеріміздің бірі – Қазақстан экономикасын дамытуға және халықаралық нарықта жоғары бағаға ие сапалы отандық өнімді жасауға үлес қосу», – деп көндіруге тырысты компания өкілі.
Холдингтің басты құндылығы – ұлт, жыныс және дініне қарамай қызметкерлерді таңдау, деп қоса айтты олар баспасөз қызметінде.
Сонымен қатар, компанияның айтуынша, «Қазақмыс» шетелдік мамандарды тек ерекше жағдайларда ғана жұмысқа алады екен.
«Жақында ғана «Қазақмыс» корпорациясы» ЖШС бас директоры қызметіне тағайындалған Олег Копытов Қазақстандағы әріптестерінің құрметіне ие болған өз ісінің нағыз кәсіби маманы. Ол тау-кен саласында 22 жылдық тәжірибесі бар білікті маман және біздің компанияда 2009 жылдан бері жұмыс істейді. Игорь Перетольчинді тағайындау себебі де осыған ұқсас, оның тау-кен өнеркәсібіндегі көп жылдық тәжірибесі өндірістік процестерді жақсартуға көмектеседі», – деді «Қазақмыс».
Евгений Козак та негізі Украина азаматы.
Компания әлеуметтік желі қолданушыларын олардың ресми хабарламаларына ғана сеніп, тексерілмеген және сенімсіз ақпаратқа иланып қалмауға шақырды.
Сіз жаңалықтар туралы не ойлайсыз