№11 қалалық емханада МСАК деңгейінде емделушілерге қызмет көрсету үшін Амбулаториялық хирургия орталығы (АХО) жұмысын бастады.
АХО құрамында хирург, травматолог, уролог мамандар бар.
№11 қалалық емхананың амбулаториялық хирургия орталығының меңгерушісі, жоғары санатты хирург Ерғали Құрмашев «осында және қазір» қағидасы бойынша амбулаториялық оталарды келесі ауруларға жасауға болатынын айтады: тері және жұмсақ тіндердің іріңді-қабыну аурулары, қол буынының іріңді-қабыну аурулары, тырнақ пластинасын алу және түзету, тері және жұмсақ тіндердің қатерсіз ісіктері, тік ішек аурулары (жіті парапроктиттер), өкпеқап қуысының пункциясы, лапароцентез және лапаропункция, тік ішектің 1-дәрежелі күрделіліктегі тері асты-шырышты қабықша жыланкөзін кесу, асқынбаған эпителиальды құйымшақ жолын кесумен отадан кейінгі жараларды қабат-қабат тігу, травматология, қол буынына оталар (гигрома, қол буынының қатерсіз ісіктері), металл құрылымдарын алып тастау, урология, бүйректің сыртқы және ішкі стенттерін алу, диагностикалық және емдік видеоуретроцистоскопия, қуықты шаю, несеп катетерін ауыстыру.
«Дәрігер-АХО маманының алғашқы консультациясының нәтижелері бойынша алынған клиникалық мәліметтерге талдау жүргізіледі, хирургиялық емдеуге медициналық көрсеткіштер мен қарсы көрсеткіштер белгіленеді, хирургиялық емдеу мүмкіндігі туралы алдын ала шешім қабылданады. Орталықтың күндізгі стационарында емделу мүмкіндігіне сәйкес алдын ала хирургиялық араласудың күні белгіленеді, ілеспелі ауруларға байланысты қарсы көрсетілімдерді (отадан кейінгі қауіптерді) болдырмау мақсатында ота алдындағы тексерулер (зертханалық, функционалдық, аспаптық, мамандардың кеңесі) тағайындалады. Ота алдындағы тексерудің нәтижелерін бағалау үшін екінші консультация күні де белгіленеді.
Тері және тері астындағы майдың қабыну аурулары мен жарақаттар сияқты шұғыл оталарды да жасаймыз», – деп түсіндірді Ерғали Құрмашев.
Алматы қаласы Денсаулық сақтау басқармасы манипуляциялардың барлық түрлері МӘМС аясында, төтенше жағдайларда ТМККК аясында жүзеге асырылатынын атап өтеді.
Сіз жаңалықтар туралы не ойлайсыз