Қазақстан инклюзивті қоғам өкілдерін қарапайым тіршілікке бейімдеп, инклюзивті қоғам қалыптастыру жолында үлкен қадамдар жасауда.
Бүгінгі таңда тек мемлекеттік деңгейде ғана емес, жеке бастамалар аясында да шығармашылық, кәсіпкерлік, жұмыспен қамту және басқа да салаларда кедергісіз орта құру мәселелері көтеріліп, шешімін табуда.
ҚР билігі елімізде инклюзивті ортаны қалыптастыруға ниет білдіріп, бірқатар халықаралық конвенцияларды қабылдап, заңға енгізген болатын. Сонымен қатар, ҚР Еңбек және халықты әлеуметтік қорғау министрлігі ел ішінде ережелер орнатып, ерекше қажеттіліктері бар адамдар үшін жұмыс орындарының квотасын бекітті.
Нәтижесінде ерекше қажеттіліктері бар азаматтарды жұмыспен қамту процесіне мемлекеттік органдар ғана емес, бизнес өкілдері де белсенді түрде қатысқан болатын. Сөйтіп, 2022 жылға қарай Қазақстанда шамамен 7 мыңнан астам мүгедектігі бар азамат жұмысқа орналастырылған еді және көпшілігі тұрақты жұмысқа да қабылданды.
Мысалы, Qazaqpress.kz интернет-порталы мен «Шеврон» компаниясы бірігіп, ерекше қажеттіліктері бар адамдарды қолдауға арналған ортақ бағдарламасын іске асырған болатын.
Негізі жоба дүниеге оңай келген болатын – Qazaqpress.kz интернет-порталының бас редакторы Ағзам Текенов «Шеврон» компаниясына өтініш жіберіп, ерекше қажеттіліктері бар адамдарды қарапайым қоғамға бейімдеп, оларға қаржылық тәуелсіздікке қол жеткізуге көмектесуді ұсынған еді.
Талапты жандар жоба аясында жақсы нәтижелер көрсетіп, жаңалықтар жазып, сайтты эксклюзивті контентпен толтырып жүргеніне 1,5 жыл болды. Ал, қазіргі таңда олар сүйікті ісімен айналысып, нәпақасын тауып отыр.
«Бізге компания қолдау көрсетті, қазіргі таңда бізде 15 адам жұмыс істейді. Біз оларға журналистиканың қыр-сырын үйретіп жүрміз: дұрыс сұхбат алуды, баспасөз конференцияларын жариялауды, жаңалықтар мен пікірлерді жазуды, ақпаратпен жұмыс істеуді және т.б. Ал, бір журналистіміз тіпті күн сайын сағат 09:00-15:00 аралығында сайтты уақытылы жаңалықтармен толтырып жүр. Оған қоса, кейде күніне 2-3 эксклюзивті материал жазып та үлгеріп жүр», – деді ол.
Айта кетелік, қызметкерлер қашықтықтан онлайн жұмыс істеп, заманауи технологиялар мен әлеуметтік желілердің мүмкүндіктерін қолынан келгенше кеңінен қолдануда.
Жалпы, инклюзивті жобалар ерекше қажеттіліктері бар адамдарға қоғамға тез бейімделіп, әлеуметтік жағдайын, өмір сүру деңгейі мен сапасын көтеруге мүмкіндік береді.
Еске салсақ, бұл «Шеврон» компаниясының әлеуметтік салаға бағытталған жалғыз жобасы емес: «Алдымен адам, одан кейін бизнес» қағидасын ұстанып, құндылық ретінде насихаттайтын компания балалар мен жасөспірімдерге арналған шығармашылық іс-шаралар мен экофестивальдерді ғана қолдап қоймай, ІТ саласындағы жастарға арналған EcoBusinessLab кәсіпкерлік ұйымның «жасыл бизнес» сынды инклюзивті жобаларын да белсенді түрде қолдауда. Соның арқасында бүгінде жастар үшін экономикаға ғана емес, қоршаған ортаға, қоғамға және бүкіл жер шарымызға пайдасын тигізе отырып, сүйікті ісі арқылы өздерінің экобизнестерін аша алатын мүмкіндіктер туды.
Сіз жаңалықтар туралы не ойлайсыз