Қазақстан үкіметі елде дизельдік отын тапшылығы қашан аяқталатынын мәлімдеді. Бұл мәселеге байланысты кімдердің жазаға тартылғаны да белгілі болды, деп хабарлайды Qazaqpress Bizmedia.kz-ке сілтеме жасап.
Президент бұйрығы бойынша Қазақстанның барлық өңірлерін дизельдік отынмен үздіксіз қамтамасыз етумен айналысатын премьер-министрдің арнайы комиссиясының құрамына негізгі мемлекеттік ведомстволар мен ұлттық компаниялардың өкілдері кіреді.
Еліміздегі маңызды отын түрінің тапшылығы бірқатар факторларға байланысты. Біріншіден, транзиттік шетел көліктері көп отын тұтынады, соның салдарынан дизель тапшылығы артты. Сонымен қатар, дизельдік отынның көршілес елдерге таралып отырғаны нарықтағы бағаның тұрақсыздығына алып келді, соның салдарынан жанар-жағармай елден тыс шығып кетті.
Қазақстандағы дизель отынының құны өзге жақын мемлекеттермен салыстырғанда әлдеқайда арзан, литріне – 230-260 теңге. Ал, Өзбекстан, Қырғызстан және Ресейде дизельдік отынның бағасы жоғары – 440 теңге шамасында сатылуда.
Отандық жанармай базалары дизель отынын нарықтағы бағадан жоғары бағамен сату фактілері тіркелді, бұл кейбір Қазақстан өңірлерінде жанармай сату көлемінің төмендеуіне алып келді, өйткені ондай бағалармен сатып алу жанармай құю станциялары үшін тиімсіз еді.
Сонымен қатар, «ҚазМұнайГаз», «Petrosun» және мұнай өңдеу зауыттары тарапынан өндіріс, маркетинг және логистика саласында олқылықтар мен түрлі кемшіліктер анықталды.
Бірақ жағдайды қалыпқа келтіріп, ішкі нарықты жанар-жағармайдың жеткілікті көлемімен қамтамасыз ету бойынша келесідей бірқатар шаралар қабылданды:
- Ағымдағы жылда дизельдік отын өндірісін 5,2 млн тоннаға дейін арттыру;
- Мұнай өңдеу зауыттарынан дизель отынын жөнелту жұмысын арттыру;
- «Самұрық-Қазына» қоры мен «ҚазМұнайГаз» ҰК АҚ арасында дизельдік отынның қосымша көлемін жеткізу туралы келісімге қол жеткізілді;
- Шымкент мұнай өңдеу зауытының өндірістік қуатын кеңейту жоспарлануда;
- 2023 жылға жоспарланған мұнай өңдеу зауытын пайдаланудың жаңа схемасына кезең-кезеңімен көшу, яғни жер қойнауын пайдаланушылар тікелей мұнай өңдеу зауыттарынан мұнайды сатып алу арқылы немесе мұнай өңдеу зауыттарын толық сатып алу арқылы жеткізетін болады.
Сонымен қатар, Энергетика министрлігі мен басқа да ірі жанар-жағармай құю станциялары желілері жанар-жағармайдың бағасы негізсіз көтерілген жағдайда немесе сатудан бас тарту фактілері анықталса, құқықбұзушылық туралы жедел түрде хабарлау үшін қазақстандықтарға арнайы байланыс орталықтары ашылды. Бұл – аталмыш өнімдермен сауда-саттық кезінде азаматтардың арасындағы әділеттілікті сақтау шарасы.
«ҚазМұнайГаз» АҚ басқарма төрағасы Мырзағалиев пен Энергетика вице-министрі Мағауовқа дер кезінде шара қолданбағаны үшін сөгіс жарияланды. Энергетика министрлігі мен ҚМГ-нің бірқатар қызметкерлеріне де тәртіптік жаза қолданылды.
Discussion about this post