23 шілдеде Нұр-Cұлтан қаласының тұрғыны Ы.Дүкенұлы көшесінің жолаушылар жолын түсіріп, шағым жасады, деп хабарлайды Qazaqpress.
Нұр-Сұлтан қаласының тұрғыны мүгедектігі бар азамат Е.Рамазан жолаушылар жолында келе жатып, сапасыз салынған тас жолды бейнетаспаға түсіріп алды. Ол мұндай жолмен арбалы мүгедектерге жүру мүмкін емес, деп шағым жасады.
«Біз бала күнімізден бері Қазақстанның көптеген жақсы бағдарламалар бастамасы туралы естіп келеміз, бірақ толыққанды іске асып жатқандары бармақпен санарлық. Мына қарапайым жолдың өзін алсақ мысалы, теледидардан үнемі жол салуға пәленбай миллион ақша бөлінді, жұмыс жүріп жатыр, ау-мау деген жаңалықтарды естиміз, ал шындығына келгенде өздеріңіз көріп тұрсыздар. Бұл проблеманың сіңірі шығып, талқыланып тасталғаны қай заман, қазір күлкіге айналып кеткен. Мысалы, инстаграмда бір әзіл-оспақ видео жүрді ғой қала әкімін мүгедектер арбасына отырғызып, жол сапасын тексертті деген. Сол сияқты бір проблема шешімін таппаса ол осылай әзіл боп, ал кейін аңыз боп қала бермек, ал негізі ол күлетін жағдай емес. Қисық жол қисық мемлекеттің белгісі», – деді ол.
Айта кетелік, «Қазақстан-2050 стратегиясы» жобасы бойынша, 2015 жылдан бастап «Нұрлы жол» бағдарламасына сәйкес жол инфрақұрылымын дамыту жұмыстары басталған болатын. Strategy2050.kz жоба сайтында «Мемлекеттік бағдарламаның бірінші бесжылдығын аяқтау қорытындысы бойынша, жақсы және қанағаттанарлық жағдайдағы республикалық маңызы бар автожолдардың үлесі 88%-ға және жергілікті маңызы бар автожолдардың үлесі 71%-ға дейін жеткізілді», – деп жазылған.
Ресми хабарламаға сүйенсек, «Нұрлы жол» мемлекеттік бағдарламасы шеңберінде 2015 жылдан бастап республикалық желідегі автомобиль жолдарын салу және реконструкциялау жөніндегі жобаларды іске асыруға халықаралық қаржы институттарынан жалпы сомасы $3,9 млрд-тан астам инвестиция тартылды.
Сіз жаңалықтар туралы не ойлайсыз