2014 жылдың наурыз айында Қазақстан азаматы Гуанчжоу әуежайында ұсталып, шекарадан есірткі алып өтпек болды деген айып тағылған болатын, деп хабарлайды Qazaqpress Sputnik-ке сілтеме жасап.
Қытайда өмір бойына бас бостандығынан айырылған қазақстандық Ақжарқын Тұрлыбайдың жазасы биыл қайта қаралу мүмкін. Бұл туралы қыздың адвокаты Сұңқар Нұрмағамбетов хабарлады.
Ол Ақжарқынның үйге қашан оралатыны көп адамды мазалайтын сұрақ екенін айтты.
– Жаза осы жылы қайта қаралу мүмкін, біз бар күш-жігерімізді салып жатырмыз, – деп жазды Нұрмағамбетов facebook парақшасында.
Адвокат Қазақстан мен Қытай арасында сотталғандарды еліне тапсыру туралы екіжақты келісімшарт бар екенін еске салды. Ол бірнеше процедурадан тұрады.
Нұрмағамбетовтың айтуынша, өмір бойы бас бостандығынан айыру жазасын қайта қарау туралы шешім Тұрлыбайды елге қайтаруға септігін тигізеді.
Сондай-ақ, Қазақстанның бас прокуратурасына сотталған азаматты қайтару туралы қолдаухат жіберу керек. Нұрмағамбетов оны 2016 жылдың сәуірінде жолдап қойған.
Бұдан бөлек, Қазақстан бас прокуратурасы мен сыртқы істер министрлігінің Қытай тарапымен өзара іс-қимылы да сотталғандарды қайтаруға әсер етеді.
Ақжарқын Тұрлыбайдың ісі
2014 жылдың наурызында Қазақстан азаматы Ақжарқын Тұрлыбай Гуанчжоу әуежайында ұсталған болатын. Оған шекарадан 4,5 келі есірткіні алып өтпек болды деген айып тағылды. Ол кезде отандасымыз 20 жаста болған еді. 2015 жылдың маусымында Қытай соты оны өмір бойына бас бостандығынан айырды. Сотта Ақжарқын шетелдік досы алдап кеткенін айтып, кінәсін мойындаған жоқ.
2016 жылы сот шешімі жойылып, іс қайта қарауға жіберілді.
Араға үш жыл салып, 2019 жылдың 27 желтоқсанында Гуанчжоу соты үкім шығарды – жаза өзгеріссіз қалды.
2019 жылы Тұрлыбайдың анасы Зухра Сейтімова Қазақстан президентінен көмек сұрап, хат жазды.
2019 жылы қыркүйегінде президент Қасым-Жомарт Тоқаев Қытайға аттанған сапарында ізгілік танытып, Ақжарқынды Отанына қайтаруға жәрдемдесуге шақырды.
Адвокаттың айтуынша, Ақжарқын отбасымен тұрақты хабарласып тұрады, хат жазысады.
Бұған дейін Қазақстанның Қытайдағы елшілігінің хабарлауынша, Тұрлыбай қасындағы сотталғандарға ағылшын тілін үйретіп жүріпті. Сонымен қатар, ол көркем әдебиет оқиды, дене шынықтырумен айналысады және қытай тілін жақсы меңгерген.
Discussion about this post