ҚР Премьер-Министрі Әлихан Смайылов өндіріс көлемі артқан негізгі салаларды атады, деп хабарлайды Qazaqpress ҚазАқпаратқа сілтеме жасап.
«Екі айдың қорытындысы бойынша Жалпы ішкі өнімнің өсу қарқыны 3,5 пайызға дейін артты. Тұрақты экономикалық өсімнің драйвері нақты сектор болды. Өнеркәсіп өндірісінің көлемі — 4,7, оның ішінде өңдеу өнеркәсібі 3,9 пайызға өсті. Өсім тіркелген негізгі салалар: фармацевтикада — 17, киім-кешек өндірісі — 12,8, машина жасау — 9,2, оның ішінде локомотивтер мен вагондар өндірісі — 23,8, автомобиль жасау — 10,2, пластмасса өнімдерінің өндірісі — 8,7, дайын металл бұйымдары — 4,4, құрылыс материалдарын шығару — 2,1 пайыз. Тау-кен өндірісі 6,4 пайыз орнықты өсімді көрсетті. Бұл саладағы тұрақты өсімге мұнай өндіруді — 9,2, табиғи газды — 8,9 және металл кендерін 1,2 пайызға ұлғайту есебінен қол жеткізіліп отыр», — деді Әлихан Смайылов бүгін Үкімет отырысында.
Оның атап өтуінше, көлік, сауда және байланыс салалары есебінен қызмет көрсету секторында 2,1 пайыз деңгейінде оң өсім байқалды. Құрылыс саласы 7,6 пайызға өсті. 1,8 млн. шаршы метр тұрғын үй пайдалануға берілді. Сондай-ақ шикізаттық емес сектордағы тұрақты инвестициялық белсенділік жедел экономикалық өсімнің негізгі факторы болды. Кен өндіру саласын есепке алмағанда инвестициялар 5,7 пайызға артты.
«Қаңтар-ақпан айларында Ақмола, Павлодар облыстарында және Нұр-Сұлтан қаласында барлық негізгі макрокөрсеткіштер бойынша өсім байқалып отыр. Ең төмен көрсеткіш Ақтөбе және Маңғыстау облыстарында тіркелді», — деді Әлихан Смайылов.
Сіз жаңалықтар туралы не ойлайсыз