16 қазан күні Еуразия Ұлттық университетінде арнайы PR мамандығының студенттері үшін Z Agency коммуникациялық агенттігінің негізін қалаушы Назым Жангазинованың спикерлік сағаты өтті, деп хабарлайды Qazaqpress
Назым Жангазинова – Dentsu Aegis британ-жапондық коммуникация холдингінде жұмыс тәжірибесі бар және University of International Business менеджмент ғылымының магистранты, қоғаммен байланыс және медиа саласында жалпы 7 жыл, ал соның 4 жылында жеке компаниясының басқарушысы ретінде қызмет атқарып келеді.
Іс-шараға деканның оқу ісі жөніндегі орынбасары Сейілбек Асанов пен академик Серікзат Дүйсенғазы қатысты.
Назым болашақ әріптестеріне бағыт-бағдар беріп, PR мамандығы жайлы жалпылай түсінік қалыптастырды. Ең әуелі, PR мамандығы туралы түрлі стереотиптер мен мифке айналған пікірлерді жойды. PR саласы өз алдына бөлек дараланған жас ғылым екенін түрте отырып, Назым саланың ірі тарихи оқиғаларынан мысалдар келтірді. Мәселен, әлемге даңқы шыққан үздік жарнамашы Клод Хопкинстің алдыңғы ғасырдың басында Shlits Brewing Company сыра компаниясына арнап жазған жарнамасынан мысал келтіріп, Димаш Құдайберген мен «Adal» партиясымен жұмыс істеген тәжірибесімен бөлісті. Сонымен қатар «EXPO 2017 Hungary» атты Венгрия елінің жобасы аясында дамытумен айналысқан болатын. Назым Жангазинова саясат, мәдениет және шығармашылық, спорт, агроөнеркәсіп өндіріс комплексі, банк секторі, ауыр өнеркәсіп және т.б. бағыттарда жұмыс істейді.
Үнемі даму үстіндегі ақпараттық кеңістік заманында бір орыннан қозғалмау – PR маманы үшін үлкен қауіптердің бірі. Бұған спикер «Adal» партиясының жаһандандыру жұмыстарынан және өзге де саяси оқиғалардан мысал келтірді. Ал кері байланыс орната отырып, қатысушылардың да белсенділікке ынтасын оятты. Ең бастысы жеке репутацияны қалыптастырғанда ел алдында асыра сілтеп сөйлеудің, халық алдында жасанды рол ойнаудың қажеті жоқ. Өзіңізді әрлегенше, шынайы қалпыңызды көрсеткен абзал, деген ойда екен Назым.
Академик Серікзат Дүйсенғазының пікірінше, Қазақстанға PR-мамандығынан сапалы сабақ беретін тәжірибелі адамдар жетіспейді, ал тіпті бар болғанмен, спикерге аудиторияда сабақ жүргізуді рұқсат беру үшін, ЖОО-ның магистр деңгейінен жоғары дипломының болу шарты тосқауыл қоюда. Алайда болашақ жас мамандарға замандас әріптестерімен тәжірибе алмасқан өте тиімді деп есептейді.
Іс-шара фотосессия мен жылы ілтипатты тілектермен қорытындыланды. Ал Назым егер сәті түссе, университет қабырғаларында тағы да дәріс оқуға қуана-қуана келісті.
Discussion about this post