Ақтөбеде екі адам қаржы пирамидасын құрып, 11 адамды алдағаны үшін сотталды, хабарлайды Qazaqpress ҚазАқпаратқа сілтеме жасап.
Оның бірі Тәжікстан азаматы.
Ақтөбе қаласының № 2 сотында С.Д. Бобоеров және П.Р.Сундутовқа қатысты қылмыстық іс қаралды. Оларға Қылмыстық кодекстің «Қаржылық пирамидасын құру және оған басшылық ету» бабы бойынша айып тағылды. Іс материалына сүйенсек, 2019 жылдың шілде айында Тәжікстан азаматы Бобоеров Қазақстан азаматы Сүндутовпен бірге қаржылық пирамида құрды. Олар азаматтарды «Unique finance» сайты арқылы «Unique finance» компаниясына салынған қаражаттан ай сайын 5-6% сыйақы алуға болатынын айтып, сендірді. Салымшылардан ақша алғаннан кейін шот құрылды. Онда материалдық құндылығы жоқ «сарапшылар» деп аталатын электронды ақша жүктелді. Осы жолмен Бобоеров пен Сундутов 2019 жылдың шілдесінен бастап 2020 жылдың қыркүйегіне дейін 11 жәбірленушіні тартып, олардың 7 094 110 теңге ақшасын иемденді. Сотталушылардың кінәсі жәбірленушілердің, куәгерлердің айғақтарымен, тергеудің хаттамаларымен, мамандардың қорытындыларымен дәлелденді.
«Прокурор сотта әрқайсысын 4 жыл мерзімге бас бостандығынан айыру жазасын тағайындауды сұрады. Қылмыстық кодекстің 217-бабы 2-бөлігінде көрсетілген санкцияда 3 жылдан 7 жылға дейін бас бостандығын шектеу не сол мерзімге бас бостандығынан айыру түріндегі жазаны көзделген. Бұл ауыр қылмыс. Залал өтелмеді. Осыған байланысты сот бас бостандығынан айыру түріндегі жазаны әділ деп санады. Заңда айқындалған талаптарды негізге ала отырып, сот С.Д. Бобоеровты 3 жыл 6 ай, П.Р.Сундутовты 3 жылға бас бостандығынан айыру жазасын тағайындады. Сотталушы Сундутовтың кәмелет жасқа толмаған балаларының бар екені ескерілді. Қылмыстық жолмен тапқан қаржыға сатып алынған мүлік мемлекет пайдасына тәркіленді. Үкім заңды күшіне енген жоқ»,- деп хабарлады Ақтөбе қаласы № 2 сотының баспасөз қызметі.
Сіз жаңалықтар туралы не ойлайсыз