Шығыс Қазақстан облысында полиция қызметкерлері заңсыз түрде ауланған бір жарым тоннаға жуық балықты тәркіледі, деп хабарлайды Qazaqpress ҚазАқпаратқа сілтеме жасап.
ШҚО Полиция департаменті баспасөз қызметінің мәліметі бойынша, 16 сәуірден бастап өңірде браконьерлікке байланысты «Уылдырық-2021» жедел алдын алу шарасы жүргізілуде. Су қоймаларында бақылау күшейтілді.
Тәртіп сақшылары Зайсан көлінің жағасындағы Қарсақбай ауылының маңында заңсыз балық аулаумен айналысқан азаматты ұстады. Азаматтың жеңіл қайығынан 5 қап түрлі балық табылды.
— Ақмектеп ауылының 33 жастағы тұрғынынан 51 келі көксерке, 4 келі шортан, 64 келі табан және 17 келі алабұға балықтары тәркіленді. Осының салдарынан келтірілген шығын мөлшері 300 000 теңгені құрады. Аталған факті бойынша ҚР ҚК-нің 335-бабы 3-бөлігінің 2-тармағына сәйкес сотқа дейінгі тергеу амалдары жүргізілуде», — деді ШҚО ПД бастығы Сағат Мәдиев.
Айта кетелік, «Уылдырық-2021» жедел алдын алу шарасы аясында 239 рейд өткізіліп, 235 құқықбұзушылық анықталды. 1400 келіден астам балық тәркіленген. Мемлекетке келтірілген залалдың жалпы сомасы 1 700 000 теңгені құрады.
Сіз жаңалықтар туралы не ойлайсыз