Алматы қаласының бас мемлекеттік санитар дәрігері Жандарбек Бекшин коронавирусқа қарсы ресейлік «Спутник V» вакцинасын салдырды, деп хабарлайды Qazaqpress Tengrinews.kz-ке сілтеме жасап.
Қала әкімінің орынбасары Ержан Бабақұмаровта та вакцина алды. Олардың екпеден кейінгі жағдайы белгілі болды.
Жандарбек Бекшиннің жағдайын Алматы қаласы тауарлар мен көрсетілген қызметтердің сапасы мен қауіпсіздігін бақылау департаментінің баспасөз қызметіндегілер хабарлады.
«Жандарбек Бекшин денсаулығының жақсы екенін айтып, халықты екпе салдыруға шақырды. Ол вакцина салған күні сағат 22.00-ге дейін және сейсенбіде сол режимде жұмыс істеді. Вакцинациядан кейін шағым, күтпеген әсер байқалмады», – деді ведомствадағылар.
Алматы әкімдігінің баспасөз қызметі өкілі Ержан Бабақұмаровтың да жағдайы жақсы екенін хабарлады.
«Ержан Бабақұмаров жұмыс орнында, денсаулығы қалыпты», – деп атап өтті әкімдіктегілер.
Айта кетейік, Жандарбек Бекшин мен Ержан Бабақұмаров 1 ақпанда екпе салдырды. Денсаулық сақтау вице-министрі, Қазақстанның бас мемлекеттік санитар дәрігері Ерлан Қиясов та коронавирусқа қарсы вакцина салдырып, екпеден кейінгі жағдайын айтқан болатын.
Сіз жаңалықтар туралы не ойлайсыз