Павлодар облысында коронавирус жұқтырғандардың көбеюіне байланысты карантин шаралары тағы да күшейтіледі, деп хабарлайды Qazaqpress Tengrinews.kz-ке сілтеме жасап.
Өңірде қалааралық, облысішілік және облысаралық жолаушылар тасымалы тоқтатылады. Демалыс күндері қоғамдық тамақтану нысандарының жұмысы жеткізу және шығару режиміне ауысады. Өңір аумағында карантин шараларын күшейту туралы жаңа қаулыны Павлодар облысының бас санитар дәрігері Батырбек Әлиев қабылдады.
– Павлодар – Ақсу қатынасын қоспағанда, ауданаралық, облысішілік және қалааралық жолаушылар тасымалы тоқтатыла тұрады. Бұдан басқа, сенбі және жексенбіде қоғамдық тамақтану объектілерінің әдеттегі форматтағы жұмысы тоқтатылады. Олар жеткізу және шығару режиміне ауысады. Карантин шараларының күшеюі сырқаттанушылықтың жалғасуымен және эпиджағдайдың нашарлауымен байланысты, – деп хабарлады Павлодар облысы санитарлық-эпидемиологиялық бақылау департаментінің өкілі Ғизат Әбешев.
Жаңа құжатта барлық сауда объектілеріне, қоғамдық көлікке, таксиге, өнеркәсіптік кәсіпорындарға, кіреберістерге, лифт кабиналарына, ұйымдарға және басқа да қоғамдық орындарға санитарлық және дезинфекциялық өңдеу жүргізілу керегі жазылған.
Қаулы 25 қаңтарда сағат 00.00-де күшіне енеді. Шектеу шаралары 8 ақпан сағат 00.00-ге дейін жалғасады.
Айта кетейік, Павлодар облысында науқастар саны күнде өсіп жатыр. Кейінгі тәулікте өңірде КВИ-дің 226 жаңа жағдайы анықталды. Науқастар арасында 12 оқушы мен екі студент бар.
Еске салайық, 20 қаңтардан бастап облыста демалыс күндеріне локдаун жарияланды. Бірқатар қоғамдық нысандардың жұмысына тыйым салынды. Қоғамдық тамақтану объектілерінің жұмыс уақыты қысқарды. Бұдан басқа, ұйымдар мен мекемелер қызметкерлерінің 80 пайызы қашықтан жұмысқа ауысты.
Сіз жаңалықтар туралы не ойлайсыз