Сенбі, 2 қаңтарда Павлодар облысының әкімі кеншілер мен энергетиктер қаласының электр станциялары мен жылу электр орталығына барды, деп хабарлайды Qazaqpress облыстық әкімдіктің баспасөз қызметіне сілтеме жасап.
Б.Нұржанов атындағы ГРЭС-1-де облыс әкіміне өндірістегі жағдай мен көмір қоры туралы айтылды. Бүгінгі күні кәсіпорынның қоймаларында 254 мың тонна қатты отын бар, бұл резерв 7 күнге жетеді. Дегенмен Әбілқайыр Сқақов станциядағы көмір қорын көбейтуді тапсырды.
— Жағдайға жеңіл қарауға болмайды. Қатты отынды қабылдауды оңтайландырып, оның қорын нормативке дейін жеткізу қажет,-деді облыс әкімі ГРЭС-1 басшылығына.
ГРЭС-2 жетекшілері өңір басшысына №3 энергоблоктың құрылысына дайындық жұмыстары жалғасып жатқандығын хабарлады. Олардың айтуынша, қазір жобаның техникалық және қаржылық аудиті жүргізіліп жатыр. Сонымен қатар кәсіпорын Қытайдан 7 мың тоннадан астам жабдықтың жеткізілуін күтіп отыр.
— Жақында бізде энергетика министрі Нұрлан Ноғаев болды, онымен аталған жобаны талқыладық. Бір жаққа шықтық деп айта аламыз. Жобалау-сметалық құжаттаманы түзетуді аяқтаған бойда оны мемлекеттік сараптамаға тапсырамыз, — деп атап өтті кәсіпорын басшысы Владимир Асташов.
Екібастұз жылу электр орталығында облыс әкіміне жылыту маусымының барысы туралы баяндалды. Олардың мәліметі бойынша, қаланың кейбір көп қабатты үйлерінің тұрғындары мезгіл-мезгіл жылудың жеткіліксіздігіне шағымданады. Жылу берушілер бұл мәселені кейбір үйлердің өз пәтерлерінде ыстық болуы үшін сорғыларды жылу желілеріне келісімсіз қосатындығы салдарынан, өзге үйлер мен пәтерлерді тиісті деңгейде жылыту мүмкін еместігімен түсіндірді. Әбілқайыр Сқақов бұл мәселені шешуді тапсырды.
— Шамадан тыс жылуды өздігінен қамтамасыз етіп отырған пайдаланушыларды анықтау керек. Бұл соншалықты қиын емес: ПИК-пен жұмыс істеп, жылу-техникалық есептерді жүргізу және жылу тасымалдағыштың кіріс пен шығыстағы параметрлерін өлшеу керек, — деді ол.
Өңір басшысы қалалық полиция басқармасында да болды. Бөлім бастығы Василий Склярдың айтуынша, 2021 жылдың алғашқы күнінде қалада тек екі қылмыс тіркелген. Екі жағдайда да бұрын көлік жүргізу құқығынан айырылған мас жүргізушілер ұсталды. Жалпы тәртіп сақшылары Екібастұздағы жағдайды тұрақты деп бағалады.
Сіз жаңалықтар туралы не ойлайсыз