Инсульттің алдын алуға болады — қауіптің бес негізгі факторы

Инсульт көбіне кенеттен дамиды, алайда оның көптеген қауіп факторларын алдын ала бақылауға болады.

Алматы қаласындағы №36 қалалық емхананың невропатологы Марал Күлжабекованың айтуынша, әсіресе артериялық қан қысымын, холестерин мен қандағы қант деңгейін тұрақты бақылау, темекіден бас тарту, дене белсенділігін сақтау және қалыпты салмақты ұстау маңызды.

«Денсаулықта мәселе туындағанша күтпеген жөн. Қан қысымын, зертханалық көрсеткіштерді жүйелі түрде бақылау және дәрігерге дер кезінде қаралу инсульт қаупін азайтуға көмектеседі», – дейді маман.

Инсульттің алғашқы белгілерін білу өте маңызды: беттің, қолдың немесе аяқтың кенеттен әлсіреуі немесе жансыздануы, сөйлеудің бұзылуы, көру қабілетінің күрт нашарлауы, тепе-теңдіктің жоғалуы немесе бұрын-соңды болмаған қатты бас ауруы.

Мұндай белгілер байқалса, дереу жедел жәрдем шақыру қажет. Жағдай өздігінен жақсарады деп күтпеу керек.

Дәрігер қан қысымын үнемі өлшеуге, холестерин мен глюкоза деңгейін бақылауға, көбірек қимылдауға, темекіден бас тартуға және профилактикалық тексерулерден уақтылы өтіп тұруға кеңес береді.

Инсульттің алдын алу оның салдарымен күрескеннен әлдеқайда оңай. Денсаулыққа қамқорлық қарапайым әрекеттерден басталады — қауіп факторларын бақылап, дәрігерге қаралуды кейінге қалдырмаңыз.