Қазақстанда жаз мезгілі әлдеқашан ауа баптағыштар сән-салтанат саналатын уақыт болудан қалды. Жыл сайын ыстық күндер ертерек басталып, соған сәйкес тұрғын үйдегі жайлылықты қамтамасыз ететін климаттық техникаға деген сұраныс артып келеді. OLX Қазақстанның талдау қызметі маусымдық фактор мен баға өзгерістерінің өзара байланысын зерттеп, 2026 жылғы мамыр және маусым айларында қандай техникаға сұраныс жоғары болғанын анықтады.
Нарық аптап ыстықпен бірге жанданды
Мамыр мен маусым айларын салыстырсақ, дәл жаздың басында климаттық техника нарығының айтарлықтай жанданғанын байқауға болады. Сатушылар барлық дерлік санаттар бойынша хабарландыруларды едәуір жиі жариялай бастаған.
Кондиционерлерді сату туралы хабарландырулар саны 31,5%-ға, мобильді кондиционерлер бойынша – бірден 73%-ға, ал желдеткіштер бойынша шамамен 61%-ға артқан. Бұл сатушылардың маусымдық сұранысты алдын ала ескеріп, салқындатқыш техника ұсынысын белсенді түрде көбейткенін көрсетеді.
Сатып алушылардың белсенділігі де айтарлықтай өсті. Ең жоғары өсім мобильді кондиционерлер санатында байқалды: хабарландыруларға берілген кері байланыстар саны 110,4%-ға артып, екі еседен асты. Желдеткіштерге деген қызығушылық та 23,2%-ға өсті.
Ал классикалық кондиционерлер санатында күтпеген үрдіс қалыптасты. Хабарландырулар саны көбейгенімен, оларға берілген пікірлер саны шамамен 10,4%-ға азайды. Ұсыныстардың көбеюі сатып алушыларға таңдау мүмкіндігін кеңейтіп, қызығушылықтың көптеген хабарландыру арасында біркелкі бөлінуіне әсер етті.
Неліктен мобильді кондиционерлер барған сайын танымал болуда?
Классикалық кондиционерлер әлі де тұрғын үйді салқындатудың негізгі құралы болғанымен, осы маусымдағы ең қарқынды өсіп жатқан санат – мобильді кондиционерлер.
Олардың басты артықшылығы – күрделі орнатуды қажет етпеуі. Мобильді кондиционерді жалдамалы пәтерде пайдалануға, бөлмелер арасында оңай ауыстыруға немесе қоныс аударғанда өзіңізбен бірге алып кетуге болады. Сондықтан дәл осы санат хабарландырулар саны бойынша да, сатып алушылар қызығушылығы бойынша да ең жоғары өсімді көрсетті.
Желдеткіштер де тұрақты сұранысқа ие болып отыр. Көптеген қазақстандықтар үшін олар ыстық күндерді көп шығынсыз өткізудің ең қолжетімді тәсілі болып қала береді.
Маусым қызғанымен техника қымбаттаған жоқ
Көпшілік жаз мезгілінде климаттық техниканың бағасы міндетті түрде өседі деп есептейді. Алайда деректер керісінше жағдайды көрсетіп отыр.
Маусым айында кондиционерлердің орташа бағасы 96,4 мың теңгені құрады. Ал мамырда бұл көрсеткіш 107,2 мың теңгеден асқан болатын. Осылайша баға шамамен 10%-ға төмендеді.
Мобильді кондиционерлердің бағасы одан да көбірек арзандады. Олардың орташа құны 106,6 мың теңгеден 84,7 мың теңгеге дейін төмендеп, шамамен 20,5%-ға азайды.
Ең үлкен өзгеріс желдеткіштер санатында тіркелді. Мамыр айында олардың орташа бағасы шамамен 42,8 мың теңге болса, маусымда 19,9 мың теңгені құрады. Яғни баға екі еседен астам төмендеген.
Мұндай өзгеріске нарықтағы ұсыныстың күрт артуы ықпал етті. Сатушылар саны көбейген сайын бәсекелестік күшейіп, сатып алушылар үшін тиімді ұсыныстар саны да артты.
Қайталама нарық сұранысын сақтап отыр
Жаңа және бұрын пайдаланылған техниканың бағасы арасындағы айырмашылық сатып алушыларға едәуір үнемдеуге мүмкіндік береді.
Жаңа кондиционердің орташа бағасы 105,1 мың теңгені құраса, пайдаланылған кондиционерді шамамен 99,1 мың теңгеге сатып алуға болады.
Жаңа мобильді кондиционерлер орта есеппен 99,9 мың теңгеден сатылса, бұрын пайдаланылған үлгілердің бағасы шамамен 90,3 мың теңгені құрайды.
Желдеткіштер санатында айырмашылық бұдан да айқын. Жаңа үлгілердің орташа бағасы 32,4 мың теңге болса, пайдаланылған желдеткіштердің орташа құны 25,6 мың теңгені құрайды.
Сонымен қатар қайталама нарықта жаңа үлгілермен салыстырғанда кондиционерлер мен елдеткіштердің ұсынысы көбірек. Бұл аптап ыстық аяқталғаннан кейін маусымдық техниканы қайта сату мәдениетінің қалыптасқанын көрсетеді.
Климаттық техника нарығы жаздың алғашқы апталарынан бастап белсенді өзгере бастайды. Дәл осы кезеңде ұсыныстар саны күрт көбейіп, сатып алушылардың таңдау мүмкіндігі айтарлықтай кеңейеді.
Сіз жаңалықтар туралы не ойлайсыз