Ұшар алдында көптеген жолаушыларды бірдей сұрақтар мазалайды: пауэрбанкті алып жүруге бола ма, салонға қанша сұйықтық кіргізуге рұқсат етіледі, туыстарға қазыны қалай жеткізуге болады немесе музыкалық аспапты қалай тасымалдауға болады? Сапарыңыз артық күйзеліссіз және әуежайда қосымша шығынсыз өтуі үшін FlyArystan рейстерінде қолжүкті тасымалдаудың негізгі ережелері туралы айтып береміз.
Қанша қолжүгін алып жүруге рұқсат етіледі?
FlyArystan лоукостер бизнес-моделі бойынша жұмыс істейді, сондықтан жолаушы сапар барысында өзіне қажет қызметтер үшін ғана ақы төлейді.
Әрбір жолаушы бортқа көлемі 56×23×36 см-ден аспайтын және салмағы 7 кг-ға дейінгі бір дана қолжүгін тегін алып өте алады. Барлық заттар бір сөмкеге немесе шабаданға сыйып тұруы тиіс. Егер қосымша сөмке, ноутбук қаптамасы немесе кәдесыйларды алуды жоспарласаңыз, олардың белгіленген қолжүгі нормасына сәйкес келетініне алдын ала көз жеткізген жөн.
Қолжүгі мен жолжүктің салмағы мен өлшемдерін тексеру әуекомпаниясы талаптарын сақтау үшін ғана емес, сонымен қатар ұшу қауіпсіздігін қамтамасыз ету және барлық жолаушылардың заттарын ұшақ ішінде ыңғайлы орналастыру үшін қажет. FlyArystan ұшақтарында заттарды тасымалдау ережелерімен әуекомпаниясының сайтында толығырақ танысуға болады.
Ұшақ бортына қандай заттарды алып жүруге тыйым салынады?
Әуе кемелерінде заттарды тасымалдау Қазақстан Республикасының заңнамасымен реттеледі. Азаматтық әуе кемелерінде тасымалдауға тыйым салынған қауіпті заттар мен бұйымдардың арнайы тізімі бар. Әуе кемелерінде заттарды алып жүру тәртібі Қазақстан Республикасы Индустрия және инфрақұрылымдық даму министрлігінің 2023 жылғы 27 шілдедегі №548 бұйрығымен бекітілген «Жолаушыларға азаматтық әуе кемелерінде тасымалдауға тыйым салынған қауіпті заттар мен нәрселердің, сондай-ақ есірткінің барлық түрлерінің тізбесін бекіту туралы» құжатымен реттеледі. Құжаттың толық мәтіні сілтеме арқылы қолжетімді.
Сонымен қатар, әуекомпания бейтаныс адамдардан ешқашан сәлемдемелерді, сөмкелерді немесе басқа да заттарды тасымалдауға қабылдамауды, тіпті олар бұл заттарды туыстарына немесе таныстарына жеткізіп беруді сұраса да, қатаң еске салады.
Жолаушыларды, қолжүгін және жолжүкті тексеруді әуежайдың авиациялық қауіпсіздік қызметінің қызметкерлері Қазақстан Республикасының заңнамасына сәйкес жүзеге асырады. Тасымалдауға тыйым салынған заттар алып жүруге рұқсат беру немесе оларды алып қою туралы шешімді қолданыстағы авиациялық қауіпсіздік рәсімдері аясында әуежайдың уәкілетті қызметтері қабылдайды. Әуекомпаниясы тексеру жұмыстарын жүргізбейді және тыйым салынған заттарды алып қою туралы шешім қабылдамайды.
Кейбір әуежайларда авиациялық қауіпсіздік бойынша қосымша талаптар енгізілуі мүмкін екенін ескерген жөн. Сондықтан сапар алдында ұшып шығатын әуежайдың ережелерімен танысып алған дұрыс.
Қандай көлемде сұйықтық алып жүруге болады?
Ең кең таралған шектеулердің бірі сұйықтықтарға қатысты. Қолжүгінде әрқайсысының көлемі 100 мл-ден аспайтын ыдыстардағы сұйықтықтарды тасымалдауға рұқсат етіледі. Барлық сұйықтықтардың жалпы көлемі бір жолаушыға шаққанда 1 литрден аспауы тиіс.
Мұнда сұйықтықтың нақты мөлшері емес, қаптаманың көлемі ескеріледі. Мысалы, көлемі 200 мл бөтелке жартылай ғана толтырылған болса да, оны ұшақ салонына алып кіруге болмайды.
Егер сұйықтық көлемі белгіленген нормадан асып кетсе, оны тіркелген жолжүкке тапсыру қажет. Жолжүк үшін мұндай шектеулер жоқ. Су, сусындар және басқа да сұйықтықтарды басқа заттарға зақым келтірмейтіндей және ағып кетуді болдырмайтындай сенімді әрі герметикалық қаптамада тасымалдауға болады.
Ноутбук, телефон және пауэрбанк алып жүруге бола ма?
Электрондық құрылғыларды қолжүгінде тасымалдауға рұқсат етіледі. Алайда литий аккумуляторларына қатысты ерекше талаптар бар. Пауэрбанктерді, қосалқы аккумуляторларды және электрондық темекілерді тіркелген жолжүкке тапсыруға болмайды. Олар тек ұшақ салонында тасымалдануы тиіс. Кейбір жағдайларда ноутбуктер, планшеттер және басқа да ірі электрондық құрылғылар ұшу әуежайының авиациялық қауіпсіздік қызметінің талаптарына сәйкес қосымша тексеруден өтуі мүмкін.
Қуаттылығы 100 Вт/сағ дейінгі портативті аккумуляторларды қосымша келісімсіз тасымалдауға болады. Қуаттылығы 100-ден 160 Вт/сағ аралығындағы құрылғыларды тек әуекомпаниясының рұқсатымен тасымалдауға болады, ал 160 Вт/сағ-тан жоғары аккумуляторлар тасымалдауға қабылданбайды.
Маңызды: бір жолаушыға 2 (екі) портативті аккумулятордан артық алып жүруге рұқсат етілмейді.
Қосалқы батареяларды өндірушінің түпнұсқа қаптамасында сақтау немесе қысқа тұйықталудың алдын алу үшін олардың түйіспелерін оқшаулау ұсынылады. Ұшу барысында пауэрбанктерді басқа құрылғыларды қуаттау үшін пайдалануға тыйым салынады.
Азық-түлік өнімдерін тасымалдау туралы не білу қажет?
Қазақстандықтар шетелдегі туыстарына жиі ұлттық тағамдарды – қазы, ет, құрт және басқа да тағамдарды алып баруға тырысады. Ет, балық, сүт және ашытылған сүт өнімдерін тек тіркелген жолжүкте тасымалдауға болады. Бұл ретте өнімдер сенімді әрі герметикалық түрде қапталуы тиіс. Халықаралық рейстерде ет өнімдерін тасымалдау үшін ветеринариялық сертификат талап етілуі мүмкін.
Құртқа келетін болсақ, ол зауыттық қаптамада болған және салмақ пен өлшем бойынша белгіленген талаптарға сай келген жағдайда жолжүкте де, қолжүгінде де тасымалдана алады.
Сонымен бірге азық-түлік өнімдерін әкелу тәртібі баратын елдің заңнамасымен реттелетінін есте ұстаған жөн. Сондықтан сапар алдында кедендік талаптармен алдын ала танысып алған дұрыс.
Музыкалық аспапты қалай тасымалдауға болады?
Шағын музыкалық аспаптарды ұшақ салонына алып кіруге болады. Егер аспаптың салмағы 7 кг-ға дейін, өлшемдері 56×23×36 см-ден аспаса, ол негізгі қолжүгі ретінде тасымалданады. Сондай-ақ аспапты қосымша ақы төлеу арқылы қосымша қолжүгі ретінде рәсімдеуге болады. Бұл жағдайда негізгі қолжүгін де өзіңізбен бірге алып жүру құқығы сақталады. Мұндай жағдайда салмағы 10 кг-ға дейінгі және өлшемі 110×30×30 см-ден аспайтын аспаптарды тасымалдауға рұқсат етіледі.
Ірі музыкалық аспаптар үшін арнайы тасымалдау қызметтері қарастырылған. Қажет жағдайларда жолаушы музыкалық аспап үшін ұшақ бортынан жеке орын рәсімдей алады. Басты талап – аспап қорғаныш қаптамада болуы және сенімді түрде оралуы тиіс. Музыкалық аспаптарды тасымалдау ережелері әуекомпаниясының сайтында қолжетімді.
Велосипедті немесе спорт жабдықтарын қалай тасымалдауға болады?
FlyArystan әртүрлі спорттық жабдықтарды: велосипедтерді, шаңғыларды, сноубордтарды, хоккей жабдықтарын, гольф құралдарын, серфинг тақталарын және басқа да спорт жабдықтарын тасымалдау қызметін ұсынады. Мұндай заттар қосымша ақы төленетін стандартты емес жолжүк ретінде рәсімделеді.
Бұл ретте, қаптамаға ерекше назар аудару қажет. Мысалы, велосипедті тасымалдау кезінде педальдарын шешіп, дөңгелектерінің ауасын шығару керек. Егер спорттық жабдық тиісті талаптарға сай қапталмаған болса, әуекомпаниясы оны тасымалдаудан бас тартуға құқылы.
Қандай заттарды жолжүкке тапсырмаған дұрыс?
Ақша, құжаттар, зергерлік бұйымдар, ноутбук, телефон, фотоаппарат, дәрі-дәрмектер және басқа да құнды заттарды тек қолжүгінде тасымалдаған жөн.
Бұл олардың тасымалдау кезінде бүлінуі немесе жоғалуы қаупін азайтады. Шабаданды қосымша қаптамамен орау да жолжүкті механикалық зақымданудан және тасымалдау барысында кездейсоқ ашылып кетуден қорғауға көмектеседі.
Саяхатшының басты қағидасы
Әуежайдағы қиындықтардың көпшілігі ережелерді бұзудан емес, оларды білмеуден туындайды.
Сондықтан сапар алдында қолжүгі мен жолжүкке қойылатын талаптарды алдын ала тексеріп, баратын елдегі шектеулермен танысып, қажет болған жағдайда қосымша қызметтерді әуежайға келместен бұрын рәсімдеген жөн. Бұл артық шығындардан сақтануға және сапарыңызды барынша жайлы етуге мүмкіндік береді.
Сіз жаңалықтар туралы не ойлайсыз