100-ден астам құтқарушы, 137 бейнебақылау камерасы, 11 теміржол бағыты, екі жаңа
жағажай және ондаған миллиард теңгелік жобалар.
ҚР Туризм және спорт министрлігі Алакөл жағалауын туристік маусымға дайындау аясында қандай жұмыстар атқарылып жатқанын мәлімдеді. Бұған дейін Respublica партиясының фракциясы Алакөлдегі
өзекті мәселелерді көтеріп, Үкіметке бірқатар ұсыныс жолдаған болатын. ҚР Парламенті Мәжілісінің депутаты Екатерина Смолякова партия қандай талаптар қойғанын және министрлік тарапынан қандай шаралар қабылданғанын түсіндірді.
«2025 жылғы жазғы маусымда ішкі туризм саласында бірқатар мәселе анықталып,
демалушылар тарапынан көптеген шағым түсті. Осыған байланысты
“Respublica” партиясы фракциясы Қазақстан Республикасының Премьер-
Министрінің атына бірнеше депутаттық сауал жолдады. Сонымен қатар
Мәжілісте қаралған “Туризм саласы мен балалар спортын қолдау туралы” заң
жобасы аясында бірқатар маңызды түзетулер мен толықтырулар енгізілді.
Алакөлдегі жағдайға қатысты келіп түскен шағымдарға байланысты Мемлекет
басшысы Қасым-Жомарт Тоқаев Үкіметке нақты тапсырмалар беріп, бұл
мәселені ерекше бақылауға алуды тапсырды», — делінген депутаттардың
ұсынысында.
Смолякованың айтуынша, негізгі мәселелердің бірі — демалушылардың судағы
қауіпсіздігі болған. Депутаттар құтқарушылар санын көбейтуді, акваториядағы
патрульдеуді күшейтуді, шомылу аймақтары мен су көліктерінің қозғалыс аумақтарын
нақты бөлуді, сондай-ақ гидроциклдер мен қайықтарға бақылауды күшейтуді ұсынған.
Министрлік мәліметінше, алдағы маусымда жағалауда 100-ден астам құтқарушы мен
әскери қызметкер, сондай-ақ қайықтар, катерлер және гидроциклдерді қоса алғанда 26
техника іске қосылады. Бұдан бөлек, 137 бейнебақылау камерасын орнату, су
көліктеріне арналған арнайы тұрақ салу, 65 жол белгісін қою және полиция
патрульдерін күшейту жоспарланған.
Respublica Алакөлдегі көлік қолжетімділігіне де ерекше назар аударды.
Депутаттардың пікірінше, туристер мен кәсіпкерлер пойыздар мен әуе рейстерінің
кестесі, билет саны туралы ақпаратты алдын ала білуі қажет.
«Туристер сапарын алдын ала жоспарлай алмайды, ал бизнес өкілдері маусымға
толыққанды дайындала алмай отыр», – деп атап өтті депутаттар.
Бұған жауап ретінде министрлік Үржар бағыты бойынша әуе қатынасын кеңейту
жұмыстары жүргізіліп жатқанын, сондай-ақ Шымкент, Өскемен және Павлодар
қалаларынан жаңа бағыттар қарастырылып жатқанын хабарлады. Жазғы маусымда
Алакөлге Астана, Алматы, Семей, Өскемен қалаларынан және Достық бекеті арқылы
қатынайтын 11 теміржол бағыты іске қосылады.
«Сонымен қатар Abai Travel мобильді қосымшасы әзірленуде, тиісті ақпарат
VisitAbai сайтында жарияланады. Биыл Алакөл жағалауында визит-орталық салу
жобасын жүзеге асыру да жоспарланып отыр», – деп жауап берді министрлік.
Respublica ұсыныстарының қатарында жағалауды бекіту мәселесі де болды.
Депутаттар толқын бәсеңдеткіштер секілді жағажай сызығын табиғи түрде
қалыптастыруға мүмкіндік беретін заманауи инженерлік шешімдерді қолдану қажеттігін
атап өтті.
Министрлік Абай облысында құны 15,2 млрд теңге болатын және ұзындығы үш
шақырымнан асатын жағалауды нығайту жобасы дайындалғанын растады. Сонымен
қатар толқын бәсеңдеткіштерді қолдану туралы ұсыныс орынды деп танылып,
мамандар тарапынан қосымша қарауға ұсынылған.
Депутаттар жағалаудың кей бөлігінде орталықтандырылған су жүйесінің жоқтығын
және ұңғымаларды пайдаланатын кәсіпкерлерге түсетін қосымша салық
жүктемесін де маңызды мәселе ретінде көтерді.
Министрлік мұның себебін жағалаудағы ретсіз құрылыс деп түсіндірді. Қазіргі таңда
бұл орталықтандырылған сумен қамтуды қиындатып отыр. Сонымен қатар ресми
жауапта салық жүктемесіне қатысты мәселе су, салық және кәсіпкерлік заңнамаларын
қамтитындықтан, бөлек ведомствоаралық талқылауды қажет ететіні айтылған.
Ұсыныстардың тағы бір бөлігі жағалаудың санитарлық жағдайы мен мемлекеттік
сатып алуларды уақытылы өткізу мәселесіне арналды. Өткен жылы жағажайларды
тазалау бойынша конкурс маусым басталғаннан кейін ғана өткізіліп, бұл
демалушылардың көптеген шағымына себеп болған.
Министрлік биыл негізгі конкурстар алдын ала өткізілгенін, абаттандыру,
жарықтандыру, санитарлық тораптар орнату, қоғамдық орындарды жөндеу және өзге
де инфрақұрылым нысандары бойынша мердігерлер анықталғанын хабарлады.
Ресми жағажай аумақтарын кеңейту жөніндегі ұсыныстар да қолдау тапты. Қазіргі
таңда жағалауда екі ресми жағажай тіркелген болса, биыл әрқайсысының ұзындығы
500 метр болатын тағы екі жаңа аумақ ашу жоспарланып отыр.
Ұсыныстардың ауқымды бөлігі көлдегі экологиялық ахуалға арналды. Депутаттар
ағынды суларға бақылауды күшейтуді, емдік балшықтарға ғылыми зерттеу жүргізуді
және табиғи ресурстарды сақтау шараларын қабылдауды ұсынды.
Министрлік мәліметінше, ескі қатты тұрмыстық қалдықтар полигоны жабылып,
жаңа жер телімі бөлінген, тазарту құрылыстары жүргізілуде. Сонымен қатар емдік
балшықтарды ғылыми зерттеу туралы ұсыныс орынды деп танылып, қосымша
пысықталатын болды.
Сондай-ақ Respublica өрт қауіпсіздігі, заңсыз сауда, электр жарығының үзілуі
және заңнамада «маусымдық бизнес» ұғымының болмауы мәселелерін де
көтерді.
Бұған жауап ретінде министрлік құны 1,4 млрд теңге болатын өрт сөндіру
депосының құрылысы басталғанын, сауда нысандарына арналған бірыңғай дизайн-
код әзірленіп жатқанын, жағалаудың энергиямен қамту жүйесін жаңғыртуға
бағытталған құны 7,9 млрд теңгелік жоба жүзеге асырылып жатқанын, сондай-ақ
«маусымдық бизнес» ұғымын заңнамалық тұрғыда бекіту жұмысын жалғастыруға
дайын екенін мәлімдеді.
Қорытындысында министрлік Respublica фракциясының ұсынымдарында көтерілген
мәселелердің басым бөлігі қазіргі таңда іс жүзінде жүзеге асырылып жатқанын немесе
ведомствоаралық деңгейде пысықталып жатқанын атап өтті. Ведомство Алакөлдегі
туристік инфрақұрылымды одан әрі дамыту және туристік қызмет сапасын арттыру
үшін мемлекеттік органдар мен әкімдіктер арасындағы үйлестіру жұмыстарын
жалғастыруға ниетті екенін жеткізді.
Сіз жаңалықтар туралы не ойлайсыз