Алматы қалалық Орталық клиникалық ауруханасында тізе және жамбас буындарын роботтандырылған әдіспен эндопротездеуге арналған заманауи технологиялар бойынша халықаралық шеберлік сабағы өтті.
Іс-шараның басты сарапшысы ретінде Абу-Дабидегі Халифа университеті кафедрасының меңгерушісі, ортопедия және роботтандырылған хирургия саласындағы халықаралық маман профессор Джонатан Конрой қатысты.
Шеберлік сабағы аясында Алматы қалалық Орталық клиникалық ауруханасының травматологтары шетелдік сарапшымен бірлесіп, буындарды эндопротездеуге арналған роботтандырылған жүйенің көмегімен оталар жасады. Қазақстандық дәрігерлер тізе буынын толық және жартылай эндопротездеудің, сондай-ақ жамбас буынын толық эндопротездеудің заманауи әдістерімен танысты.
Мамандардың айтуынша, роботтандырылған жүйені қолдану импланттарды орнату дәлдігін айтарлықтай арттыруға, хирургиялық араласудың жарақаттылығын азайтуға және отадан кейін пациенттердің қалпына келуін жеделдетуге мүмкіндік береді.
Алматы қалалық Орталық клиникалық ауруханасының директоры Алмат Чормановтың айтуынша, осындай халықаралық білім беру іс-шараларын өткізу Қазақстандағы жоғары технологиялық медицинаның дамуына, жетекші шетелдік мамандармен тәжірибе алмасуға және отандық хирургтердің біліктілігін арттыруға ықпал етеді.
Сіз жаңалықтар туралы не ойлайсыз