Қазақстан тағы да Орталық Азияның интеллектуалдық және технологиялық даму орталығына айналмақ.
11–13 маусым аралығында Алматы қаласында жыл сайынғы New Vision Forum өтеді. Бұл — тұрақты бизнес-қоғамдастықтарды қалыптастыруға арналған аймақтағы басты іскерлік шара. Форум жұмысына 4000-нан астам кәсіпкер мен 200 жетекші компания өкілдері технология және басқару саласындағы өзекті мәселелерді шешу үшін жиналады.
Бағдарлама аясында әлемдік деңгейдегі спикерлер мен танымал сарапшылар сөз сөйлейді. Олардың қатарында Жозе Мануэл Баррозу (Еуропалық комиссияның экс-төрағасы), Дон Тэпскот (цифрлық экономика және блокчейн сарапшысы), Люк Джулия (Siri негізін қалаушылардың бірі), Джон Грей (әйгілі «Еркектер Марстан, әйелдер Венерадан» бестселлерінің авторы) және Саша Мишо (Glovo негізін қалаушы) бар.
Жобаның бастамашылары — Мақсат Құрбенов пен Қанат Көпбаев ашық диалог алаңын құруды мақсат етіп отыр. Форумға қазақстандық бизнестің көшбасшылары: Айдын Рахымбаев (BI Group), Елдар Әбдіразақов (Centras Group), Арманжан Байтасов (Tan Media Group), Әділ Тасболатов (Royal Flowers) және тағы басқа беделді тұлғалар қатысады. Сондай-ақ шараға бизнес визионерлері, мемлекеттік орган өкілдері, инвесторлар, креативті индустрия және технология саласының новаторлары шақырылған.
«Форумда әлемдік деңгейдегі сарапшылар мен қазақстандық мықты көшбасшылар ой бөліседі. Әсіресе, Жозе Мануэл Баррозудың қатысуы біз үшін ерекше маңызды. Ол — он жыл бойы Еуропалық комиссияны басқарған және Португалияның Премьер-министрі болған әлемдік деңгейдегі саясаткер. Мұндай сарапшылармен диалог құру жаһандық геосаяси жағдайды талдауға және отандық бизнестің әлемдік экономикадан өз орнын табуына мүмкіндік береді. Оның халықаралық институттарды басқарудағы тәжірибесі біздің жобаларды Қазақстан шекарасынан тыс жерлерге шығару үшін қажетті бірегей көзқарас береді», — дейді форум негізін қалаушы әрі бас директор Мақсат Құрбенов.
Жеке тиімділік пен технологиялардан бөлек, New Vision Forum-ның басты тақырыптарының бірі — геосаясат және отандық бизнесті халықаралық нарыққа шығару стратегиясы болмақ. Қазіргі таңда кәсіпкерлер үшін жаһандық трендтерді жіті түсіну аса маңызды. Форумда компанияларды масштабтау, шетелдік серіктестер табу және жаңа экономикалық шынайылыққа бейімделу жолдары қарастырылады.
«Әлем тез өзгеруде, сондықтан қазақстандық бизнес халықаралық аренада батыл әрекет етуі тиіс. Біздің кәсіпкерлердің жаһандық деңгейдегі компаниялар құру үшін әлеуеті де, жігері де жетеді деп сенемін. Біз New Vision Forum-ды әрбір кәсіпкер үйреншікті шеңберден шығып, өз ісіне жаңа қырынан қарай алатын еркін кеңістік ретінде қалыптастырдық», — деп атап өтті Kusto Group қосалқы құрылтайшысы, форум төрағасы Қанат Көпбаев.
Форум барысында қатысушылар ортақ міндеттерді талқылап, тәжірибе алмасу арқылы өз жобалары үшін оңтайлы шешімдер қабылдай алады.
Айта кетейік, өткен жылдары бұл жаһандық алаңда 200-ден астам спикер сөз сөйлеп, стратегиялық диалог пен көшбасшылық шешімдер әзірлеудің тиімді платформасына айналды. Шараға 100-ден астам экспонент-компания қатысып, жүздеген сессиялар мен воркшоптар өткізілген болатын.
Биыл New Vision Forum-да 5000-нан астам қатысушы бас қосады. Бағдарлама компаниялардың өсуіне септігін тигізетін нақты бизнес-кейстерді талдауға бағытталған. Ұйымдастырушылардың пікірінше, бұл шара құрылтайшылар мен топ-менеджерлерге, инвесторлар мен маркетологтарға, сондай-ақ креативті және технологиялық командалар үшін де өте пайдалы болмақ. Іскерлік бағдарламамен қатар, қатысушыларға нетворкинг, интерактивті аймақтар мен технологиялық көрмелер ұсынылады.
Билет құнына New Vision Expo көрмесіне кіру, шеберлік сабақтарының жазбалары, жабық сессияларға қатысу және арнайы пакеттер аясындағы мәдени бағдарламалар енгізілген.
Іс-шараның ұйымдастырушысы — Nobel Fest. Форум Алматы қаласының әкімдігі қолдауымен өтуде. Ресми әуе тасымалдаушысы — Air Astana. Форумның ресми серіктестері: Kusto Group, білім беру компаниясы Q Group, қазақстандық ASIYA бренді, Berik and Bayan Kaniyev Foundation, KIT Business Community, Chatium және MYD Production. Сондай-ақ, іс-шара серіктестері ретінде “Нұрбанк” АҚ мен Kusto Home өңірдегі бизнес, білім беру және инновациялар жөніндегі диалогтың дамуын қолдауда.
Сіз жаңалықтар туралы не ойлайсыз