Цифрлық технологиялар, жасақтамалар, деректермен жұмыс пен клиенттік тәжірибеге басымдық беруінің арқасында сақтандыру компаниялары қаржылық цифрлық экожүйелерде орталық орынға ие бола алады. Бұл туралы бүгін Астанада өткен Freedom экожүйесінің Freedom Inside’26 форумы аясында «Freedom Insurance» СК» АҚ басқарма төрағасы Азамат Керімбаев мәлімдеді.
Азамат Керімбаевтың пікірінше, экожүйе аясындағы сақтандыру компаниялары клиенттік базаның, қызметтер мен жаңа өнімдердің драйверіне айнала алады. Ол үшін негізгі процестерді цифрландырып, оны бүкіл нарық ауқымында кеңейтуге болатын ІТ-платформаны құру қажет. Freedom Insurance болса бұл кезеңдерден өтіп қойған. Freedom экожүйесіне интеграциялану сақтандырудың жай ғана өнім емес, клиенттің экожүйеге жаппай кіру нүктесіне айналуына мүмкіндік берді.
«Freedom бренді аясында жеті жыл бойы даму арқылы біз сегіз есе өсіп, сақтандырудың клиент үшін анағұрлым жылдам, ашық әрі түсінікті жаңа моделін қалыптастыра алдық. Келесі кезең қызмет көрсету мен инфрақұрылымды күшейтуді қамтиды. Енді біз сақтандыру полисін ғана сатпаймыз, қызметті алу сәтінде клиентке «толыққанды аяқталған» шешім ұсынамыз. Бүкіл процесті өз мойнымызға алып, клиенттің қолданыс тәжірибесін жақсартып, назарды тек сақтандыру төлемінен клиент үшін түпкілікті нәтижеге аударамыз», — деп түсіндірді Азамат Керімбаев.
Таңдалған стратегияның дұрыстығы жұмыс нәтижелерінен көрініп-ақ отыр. Freedom Insurance шағын компаниядан Қазақстандағы жалпы сақтандыру нарығындағы ең ірі үш сақтандырушының қатарына дейін өсіп, міндетті автосақтандыру нарығының 40%-ын иеленіп отыр. Сонымен қатар компания 1 миллионнан астам белсенді клиенті бар цифрлық сақтандыру қызметтері нарығының көшбасшысы саналады, ал олардың 40%-ы бүгінгі күні SuperApp-тың тұрақты пайдаланушылары. Қазір Қазақстандағы автокөлік иелерінің азаматтық-құқықтық жауапкершілігін міндетті сақтандыру бойынша әрбір үшінші полис Freedom Insurance арқылы рәсімделеді. Компанияның экожүйеге енгізілуінің арқасында клиентті Freedom-ның цифрлық ортасына көшіру мүмкін болды. Сақтандыру арқылы алғашқы байланыстан кейін клиент экожүйе ішінде қалып, банк, қызмет көрсету және lifestyle-өнімдерді пайдалана бастайды, ал өзара әрекет тұрақты сипатқа ие болады. «Сондықтан мұнда сақтандыру бірден үш қызметті атқарады: клиентті тартады, экожүйеге біріктіреді және көрсетілетін қызметтері арқылы ұстап қалады. Бұл алгоритм бізді бүкіл топ өсімінің толыққанды драйверіне айналдырады», — деп атап өтті Азамат Керімбаев.
Компания деректермен жұмысқа, соның ішінде скоринг пен аналитикаға ерекше назар аударады. Бұл тарифтерді дәлірек есептеуге, залалдылықты тиімдірек басқаруға және алаяқтықты бастапқы кезеңдерде анықтауға көмектеседі. Барлық шешімдер осы кезеңдерде нақты сол уақытта қабылданады. «Нәтижесінде біз бизнес үшін жай ғана тиімділікті емес, клиент үшін әділ әрі ашық өнімді қалыптастырамыз. Шынында, деректер біздің бәсекелестік артықшылығымызға және тұрақты өсімнің негізіне айналып отыр», — деп хабарлады сақтандырушы.
Залалдарды цифрлық реттеу компанияның көрсететін қызметтерін трансформациялаудағы негізгі кезеңге айналды. DTP.kz жобасы жаңа модельге көшудің көрінісі болды, демек енді жол-көлік оқиғасын қағазсыз және сақтандырушы кеңсесіне жүгінбей-ақ рәсімдеп, реттеуге болады. «Клиент үшін бұл – жылдам рәсімдеу, ашық процесс пен бюрократияға барынша аз тірелу. Ал нарық үшін бұл мемлекеттік органдарға түсетін жүктеменің азаюына және реттеу үдерісінің жеделдеуіне жол ашты. Іс жүзінде біз жаңа мінез-құлық үлгісін қалыптастырып жатырмыз, яғни залалды цифрлық реттеу біртіндеп балама емес, үйреншікті стандартқа айналып келеді. Бұл – цифрландыру арқылы сақтандыру нарығының инфрақұрылымын қалай өзгертуге болатынының бір мысалы», — деп өз ойын бөлісті сарапшы.
Компания өтемақы төлеу моделін өзгерту бойынша жұмыс істеп жатыр, ақшалай өтем төлеуден көлікті жөндеу түріндегі өтем алуға көшу көзделген. Осылайша, клиент бірден дайын шешімге, яғни серіктес желідегі сервистер арқылы автокөлікті қалпына келтіруге қол жеткізеді. Ал компания өз кезегінде кызмет көрсетудің сапасын жақсартып, процесті және реттеу мерзімдерін бақылап, залалдарды болжай алады. «Бұл жерде клиент мәселемен бетпе-бет жалғыз қалмайды, керісінше, басынан бастап нәтижеге қол жеткізгенге дейін түсінікті әрі басқарылатын үдеріске ие болады. Біз назарды төлемнің өзінен клиент үшін түпкілікті нәтиженің сапасына аударамыз», — деп түсіндірді спикер.
Реттеу процесін одан әрі жетілдіру үшін компания компьютерлік көру технологиялары негізіндегі жасақтамалар арқылы зақымды бағалауды автоматтандыруды жоспарлап отыр. Бейнелерді талдау арқылы жүйе автокөліктің зақымдану сипаты мен ауқымын автоматты түрде анықтап, клиент ұзақ тексерулер мен келісу рәсімдерін күтпей-ақ алдын ала бағалауға қол жеткізеді. Осылайша, бағалау процесі адам факторына тәуелділікті азайтып, анағұрлым стандартталған әрі түсінікті бола түседі. Бұл тетік оңай кеңейтіледі, яғни ресурстарға елеулі жүк түсірмей-ақ өтінімдердің көп санын өңдеуге мүмкіндік береді.
Азамат Керімбаевтың айтуынша, бүгінде компания нарықтағы сақтандыруға деген көзқарасты өзгертіп жатыр. «Біз технологиялар барлық процестің негізіне айналған, ал деректер нақты шешімдер қабылдауға көмектесіп, клиенттік тәжірибені жақсартатын модель қалыптастырып жатырмыз. Алайда барлық нәтиженің артында үнемі команда тұрады. Адамдар, олардың сараптамалық білімі, ниеті мен өзгеруге қабілеті осы трансформацияны жүзеге асырып, бізді алға жетелейді. Осы тұрғыдан алғанда, сақтандыру жай ғана өнім болудан қалып, қызмет көрсетуге, экожүйе инфрақұрылымының бір бөлігіне айналады. Онда клиент өзара әрекеттесудің әр кезеңінде нақты құндылыққа ие болады», — деп түйіндеді спикер.
Сіз жаңалықтар туралы не ойлайсыз