Қазақстанның инновациялық және телекоммуникациялық жүйелер университетінде Қазақстан Республикасының жаңа Конституциясы жобасын талқылауға арналған академиялық тыңдау өтті. Іс-шара елдің құқықтық жүйесін жаңғырту және конституциялық реформалау мәселелері бойынша ғылыми-сараптамалық диалог алаңына айналды.
Академиялық тыңдауды университет ректоры, облыстық мәслихат депутаты Баяхов Әліби Науханұлы ашып, жаңа Конституция жобасының мемлекет дамуы үшін маңыздылығына тоқталды. Ол құқықтық мемлекет қағидаттарын нығайтуда, азаматтардың құқықтары мен бостандықтарын қорғауда бұл құжаттың айрықша рөл атқаратынын атап өтті.
Іс-шара барысында цифрландыру жұмыстары бойынша проректор Дусказиева Жанар Нұрлыбаевна Мемлекет басшысының бастамасымен әзірленген жаңа Ата заң жобасының негізгі бағыттарына кеңінен тоқталды. Оның айтуынша, Конституциялық комиссияның жұмысы аясында ашық қоғамдық талқылаулар өткізіліп, азаматтар мен сарапшылардан түскен ұсыныстар жан-жақты зерделенген. Соның нәтижесінде жаңа Конституция жобасы әзірленіп, көпшілік назарына ұсынылған.
Сонымен қатар, Құқықтану кафедрасының аға оқытушысы Жанғалиев Ринат Жұмагелдіұлы құқықтық мемлекетті нығайту, адам құқықтарын қорғау және билік тармақтары арасындағы тепе-теңдікті қамтамасыз ету мәселелері бойынша ғылыми-құқықтық талдау жасады.
М.В.Ломоносов атындағы Мәскеу мемлекеттік университетінің профессоры, техника ғылымдарының докторы, Қазақстанның инновациялық және телекоммуникациялық жүйелер университетінің академиялық серіктесі Кибальников Сергей Владимирович те сөз сөйлеп, конституциялық реформалардың халықаралық тәжірибедегі орны мен маңызына тоқталды.
Іс-шара соңында талқылауды «Қазақстанның 100 жаңа есімі» жобасының иегері, Қазақстан Ұлттық инженерлік академиясының вице-президенті, «Жаңару» жалпыұлттық сыбайлас жемқорлыққа қарсы қозғалысы» РҚБ Батыс Қазақстан облыстық филиалының директоры, Қазақстанның инновациялық және телекоммуникациялар жүйелері университетінің құрылтайшысы, академик Әйтімов Ақсерік Сарыұлы қорытындылап, конституциялық реформалардың ел дамуы үшін стратегиялық маңызын атап өтті.
Сондай-ақ, іс-шараға қатысушылар мұндай академиялық алаңдар қоғамның құқықтық санасын арттыруға және азаматтық белсенділікті күшейтуге оң ықпал ететінін жеткізді.
Фото: Sputnik / Владислав Воднев.
Сіз жаңалықтар туралы не ойлайсыз