29 қаңтарда продюсерлер Олжас Нұрбай, Максим Акбаров пен Роман Павлингер ұсынған жаңа «Қызым» фильмі жарыққа шығады.
Идея авторы әрі қоюшы режиссер — Олжас Нұрбай, ал қоюшы оператор — Нұрсұлтан Базарбай. Жобаның түсірілімі Алматы, Екібастұз және Баянауыл қалаларында, сондай-ақ Торайғыр көлінде өтті. Кинода аналардың бейнесі жиі көрініс тапқанымен, бұл туындының негізгі өзегі — әке тұлғасы.
Драмеди жанрындағы фильм бір отбасының оқиғасын баяндайды. Әкесінің денсаулығы сыр берген соң, үш қыз жесір әкесіне жар табуға бел буады. Алайда бұл әрекет әкесінің жүрегінде баяғыдан бар махаббатты ғана емес, өз өмірлеріндегі шешілмеген сезімдер мен ішкі жараларды да ашып жібереді.
Комедиялық сәттермен қатар, бұл туынды көпшілікке таныс тақырыптарды қозғайды: отбасылық дағдарыс, қарыз мәселесі, әлеуметтік желілердегі бейнемен өз өмірін салыстыру, ата-ананың мойындауына деген қажеттілік, апалы-сіңлілі қарым-қатынас, кемел жастағы махаббат және басқа да өмірлік жағдайлар.
Басты рөлдерде мықты әрі танымал актерлер — Әбунасыр Серіков, Баян Алагузова, Жазира Еркін, Аида Құрманғалиева, Алма Халмұханова және Ерболат Әлқожа. Көрермен Баян Алагузованы жаңа мейірімді, нәзік әрі жылы образда көрсе, Әбунасыр Серіков алғаш рет драмалық рөлді сомдайды.
«Қызым» фильмінің түсірілімі актерлер үшін ерекше әрі жылы өтті. Актриса және блогер Аида Құрманғалиева (Mona) бұл жобаны терапиямен салыстырады:
«Сценарий бойынша кейіпкерімнің әкесімен деген қарым-қатынасы маңызды орын алады. Өз әкем өмірден өткеннен кейін, рөл арқылы болса да “әке” деп айту, еркелік пен ішкі дүниемді ақтару — мен үшін ерекше сезім болды.»
Оған қоса, түсірілім барысында кейбір актерлер күтпеген сынақтармен бетпе-бет келіп, өздері үшін жаңа қырларын ашқан. Жазира Еркін рөлін зерттеу барысында қандай ізденіске тап болғанын айтып берді:
«Кейіпкерімнің әлсіздігін қабылдай тұра, өз әлсіздігімді де мойындауға тура келді. Эмоционалдық тұрғыдан бұл рөл мен үшін оңай болған жоқ. Кейіпкерді терең әрі шынайы ашу үшін көп еңбек сіңірдім», — деп бөлісті актриса.
Актерлік құрамның айтуынша, «Қызым» — ой салатын, ішкі өзгеріске талпыныс беретін және маңызды шешімдерге жетелейтін осы қыстың ең жылы премьерасы.
«Қызым» фильмінің трейлері желіде қолжетімді, ал 29 қаңтардан бастап туынды барлық кинотеатрларда көрерменге жол тартады.
Сіз жаңалықтар туралы не ойлайсыз