Қазан айы дәстүрлі түрде гардеробты жаңартудың уақыты саналады: студенттер каникулдан кейін оқуына оралады, компаниялар кадр іздеуін жандандырады, ал ірі қалалар тұрғындары салқын маусымға арналған базалық киім жиынтығын толықтырады. Биылғы жылы маусымаралық киімге сұраныс жоғары күйінде қалып отыр, бірақ үрдіс саналы тұтыну бағытына қарай ығысуда: сатып алушылар сапа мен стильден бас тартпай, үнемдеудің жолдарын көбірек іздей бастады.
Маусымның негізгі санаттары
OLX Қазақстанның талдау қызметінің деректеріне сәйкес, 2025 жылдың күзінде үш тауар тобы айқын көш бастап тұр, олар: күртелер, пальтолар және тренчтер. Осы үш категория күзгі киімге қатысты барлық сұраныстың 70%-ға жуығын құрайды.
Әйелдерге арналған күртелер ең жоғары қызығушылыққа ие: екінші нарықта шамамен 1900 жаңа хабарландыру және 5600-ден астам сатып алу тіркелген. Жаңа күртенің орташа бағасы – шамамен 31 200 теңге, ал қолданылғандары – 16 900-21 900 теңге аралығында.
Жаңа әйелдер пальтосының орташа бағасы 37 600-48 700 теңге шамасында, second-hand сегментінде – 16 600-21 500 теңге аралығында. Ерлер арасында сұраныс базалық және премиум санаттар арасында бөлінген: бағалар 19 900 теңгеден (қолданылған) 57 300 теңгеге дейін (жаңа) өзгереді.
Тренч – соңғы маусымдардың басты тренді. Әйелдер тренчтері жаңа сегментте 17 500 теңгеден басталады, ал екінші нарықта 12 800-13 200 теңге аралығында.
Сонымен қатар, жилеттерге (жеңсіз күрте) деген қызығушылық та артқан: әйелдер санатында жаңа модельдердің 270-тен астамы орта есеппен 9 900-15 000 теңгеге сатылған, ал екінші нарықта – 388 сатып алу орташа 21 400 теңгемен тіркелген. Ерлер үшін де жилет классикалық күртелерге балама ретінде танымал бола бастауда.
Үнемдеудің жолдары
- Екінші нарыққа басымдық беру
Қолданылған киім сегментінде сұраныс жаңа тауарлардан жылдамырақ өсуде. Мысалы, әйелдер күртелері орта есеппен жаңа үлгілерден 30-40%-ға арзан түседі. Сонымен қатар, таңдау өте кең: нарықта 2700-ден астам белсенді хабарландыру бар. Олардың арасында «жаңаға жақын» немесе тіпті заттаңбасы бар, мүлде жаңа бұйымдар кездеседі. Бұл – сапалы киімді тиімді бағамен алу мүмкіндігі.
- Маусымаралық киімдер
Күртелер мен жеңіл күртелер (ветровка) – қыркүйектен қарашаға дейін киюге болатын әмбебап нұсқалар. Ерлер жеңіл күртелері екінші нарықта 9 800-10 700 теңге, ал әйелдердікі шамамен 8 000 теңге тұрады.
- Толық жаңартудан гөрі аксессуарларға назар аудару
Шарфтарға деген сұраныс аса жоғары болмаса да, тұрақты. Жаңа модельдердің бағасы 2 500-5 000 теңге аралығында. Мұндай аксессуарлар өткен жылғы пальто немесе күртені заманауи стильге бейімдеуге көмектеседі, әрі жаңа сырт киімге ондаған мың теңге жұмсаудың қажеті болмайды.
- Көпфункциялылыққа басымдық
Сатып алушылар түрлі жағдайға жарайтын киімдерді жиі таңдайды. Мысалы, классикалық тренчті іскерлік костюммен де, джинсымен де киюге болады, ал жеңіл жилет пальто астындағы қосымша жылы қабат ретінде қолданылады.
Баға үрдістері
Маусымаралық киімдердің орташа құны жоғары деңгейде қалып отыр, бірақ баға динамикасы категориялар бойынша әртүрлі:
- әйелдер пальтосы бір жыл ішінде 30%-ға,
- ерлер күртелері – 15%-ға қымбаттаған,
- тренчтер – ұсыныстың көптігі арқасында тұрақтылықты сақтап тұр.
Сонымен бірге, екінші нарықта баға баяу өсуде: мысалы, ерлер күртелері тек 2-3%-ға қымбаттаған. Бұл second-hand сегментін тұтынушылар үшін тартымды етеді, әсіресе үй шаруашылықтарының шығындары артып жатқан жағдайда өзекті.
Компаниялар үшін бұл ассортиментті қайта қарау қажеттілігін білдіреді: назар базалық категорияларға (күртелер, пальтолар, тренчтер) және қолжетімді баға сегментіне аударылуы тиіс. Ал сатып алушылар үшін – әр зат өзара үйлесетін, функционалды «капсулалық гардероб» қағидатын ұстануға мүмкіндік.
2025 жылдың күзіндегі басты тренд – саналы үнем.
Қазақстандықтар стиль, қолайлылық және баға арасындағы тепе-теңдікті іздеуде. Жаңа мен second-hand заттарды үйлестіре алатындар, классикалық үлгілерге инвестиция салып, оларды аксессуарлармен толықтыра білетіндер ұтады.
Сіз жаңалықтар туралы не ойлайсыз