2025 жылғы 16 қазанда Алматыда өткен Central Asia Warehouse Summit (CAWS 2025) форумының аясында қойма девелопменті мен инвестициялар саласындағы өңірлік консалтинг көшбасшысы — IBC Global компаниясы қазақстандық және халықаралық серіктестерімен бірлесе отырып, Орталық Азияда алғашқы қойма жылжымайтын мүлкіне инвестициялық қорлардың іске қосылғанын жариялады.
Сөз екі құрылым туралы болып отыр — Eurasian Warehouse REIT OEIC Ltd. және Central Asia Warehouse PEF OEIC Ltd. Бұл қорлар Қазақстан мен Орталық Азия елдерінде заманауи қойма инфрақұрылымын дамытуға бағытталған. Екі қор бойынша инвестициялардың жиынтық көлемі $250 миллионнан асады.
TG Global (Tansar Capital Group) компаниясының қатысуымен құрылатын Eurasian Warehouse REIT OEIC Ltd. жылжымайтын мүлікке инвестициялық траст (REIT) форматында жұмыс істейтін болады. Қордың мақсатты көлемі — $75 миллион, ал күтілетін орташа кірістілік (IRR) — 18–22%. Инвестициялардың басым бөлігі Қазақстан, Өзбекстан және басқа да өңір елдеріндегі дайын нысандарға бағытталады.
Екінші қор — Central Asia Warehouse PEF OEIC Ltd., Provident Fiduciary Ltd. және Roemer Silk Road (Roemer Capital) компанияларымен бірлесіп құрылып жатыр. Бұл қор девелоперлік және тікелей инвестицияларға шоғырланады. Оның мақсатты көлемі — $200 миллион, инвестициялық кезеңі — 5 жыл. Қор портфеліне Қазақстан, Өзбекстан және Орталық Азияның басқа елдеріндегі 20–40 мың шаршы метр көлеміндегі нысандар кіреді.
Қорлар Астана халықаралық қаржы орталығы (АХҚО) юрисдикциясында тіркеледі, бұл инвесторлардың құқықтарын қорғаудың халықаралық стандарттарын, сондай-ақ капитал тартудың икемді құралдарын қамтамасыз етеді.
«Біз жай ғана қорлар емес, капиталды, тәжірибені және нақты жобаларды біріктіретін институционалдық платформа қалыптастырып жатырмыз. Бұл — Орталық Азияда қойма жылжымайтын мүлігінің дамыған нарығын қалыптастырудағы алғашқы қадам», — деп атап өтті IBC Global компаниясының бас директоры Станислав Ахмедзянов.
«Қазақстан өңірлік транзиттік хаб ретіндегі орнын нығайтып келеді, ал Өзбекстан ірі ішкі нарыққа жол ашады — бұл үйлесім қойма жылжымайтын мүлкінің өсуіне күшті серпін береді. Заманауи алаңдардың жетіспеушілігі жағдайында сектордың әлеуеті өте жоғары. Біздің міндетіміз — капитал ағынын қамтамасыз ету және инвесторларға осы өсімнің бір бөлігі болуға мүмкіндік беру», — деді Provident Fiduciary Ltd. компаниясының бас директоры Асет Абдығаппаров.
«Біз тікелей инвестициялармен бұрыннан айналысып келеміз және Орталық Азияда А класты заманауи қойма алаңдарына өсіп келе жатқан сұранысты көріп отырмыз. Қытайдың “Бір белдеу — бір жол” бастамасының кеңеюін ескере отырып, бұл сектор стратегиялық маңызға ие болуда. Біз сапалы қойма инфрақұрылымына салынған инвестициялар серіктестеріміз бен инвесторларымыз үшін тұрақты және ұзақ мерзімді табыс әкеледі деп күтудеміз», — деп қосты Roemer Silk Road компаниясының басқарушы серіктесі Алексей Петров.
CAWS 2025 форумының аясында ынтымақтастық туралы меморандумдарға қол қойылды. Бұл саммит өңірдегі қойма және индустриялық жылжымайтын мүлікті дамыту мәселелерін талқылайтын басты алаңдардың біріне айналды. IBC Global ұйымдастырған бұл саммит Алматыда екінші жыл қатарынан өтіп, саланың кәсіби біртұтас стандартын қалыптастыру мақсатында девелоперлерді, инвесторларды және нарық операторларын біріктіреді.
Сіз жаңалықтар туралы не ойлайсыз