Алматыда Орталық қалалық клиникалық аурухананың дәрігерлері медицинадағы ең қауіпті жағдайлардың бірі — құрсақ аортасының аневризмасы жарылған науқастың өмірін сақтап қалды.
Пациент қабылдау бөліміне ауыр жағдайда жеткізілді. Оны бел мен іш аймағындағы қатты ауырсынулар мазалап, әлсіздік пен өңінің бозаруы байқалды.
Профессор Серік Тұрсынбаев пен қан тамыр хирургиясы бөлімінің меңгерушісі Рахман Сапарбаевтың бірлескен тексеруінің нәтижесінде бірден диагноз қойылды: құрсақ аортасының аневризмасы жарылуы.
Бұл жағдай көбіне қайғылы аяқталады. Медициналық статистикаға сәйкес, мұндай науқастардың 90%-ы ауруханаға жетпей көз жұмады, ал жедел операция жасалғандардың тек 10–20%-ы ғана аман қалады.
Санаулы минуттар ішінде анестезиологтар Игорь Кимнің жетекшілігімен науқасты операцияға дайындады. Кейін қан тамыр хирургтарының бригадасы аса күрделі операция — аневризманы резекциялау және аортаны протездеуді сәтті жүзеге асырды.
Араға екі күн салып науқастың жағдайы тұрақталып, ол жансақтау бөлімінен жалпы палатаға ауыстырылды. Бүгінде ол өздігінен қозғалып, үйіне шығаруға дайындалуда.
Дәрігерлердің айтуынша, бұл жағдай — сирек кездесетін сәттілік.
Аневризманың алдын алудың ең тиімді жолы — оны дер кезінде анықтау. 65 жастан асқан ер адамдарға, әсіресе темекі шегетіндерге, ауру қаупін жоққа шығару үшін құрсақ қуысының УДЗ-ін бір рет өткізу жеткілікті.
Сондай-ақ темекіден бас тарту және қан қысымын бақылауда ұстау аневризма дамуының ықтималдығын айтарлықтай төмендетеді. Ал егер аневризма анықталса, қан тамыр хирургының тұрақты бақылауында болу жоспарлы операция жасауға мүмкіндік береді. Бұл — шұғыл операцияға қарағанда ондаған есе қауіпсіз.
Пациент өзіне екінші өмір сыйлаған кәсіби шеберлігі, үйлесімді іс-әрекеті және жанқиярлық еңбегі үшін Орталық қалалық клиникалық аурухана ұжымына шынайы алғысын білдірді.
Сіз жаңалықтар туралы не ойлайсыз