Қан обырының белгілері білінбейді: лейкемия туралы не білу керек.
Лейкемия, немесе қан обыры – бұл сүйек кемігінде қан жасушаларының жетілмеген түрлерінің бақылаусыз көбейетін қатерлі ауруы.
АОО онкологы Мадина Мирзаеваның айтуынша, бұл дерт жедел немесе баяу дамуы мүмкін және алғашқы кезеңдерінде айқын белгілер бермейді. Сол себепті лейкемияны дер кезінде анықтау қиынға соғады, ал емдеу кешірек, ауру асқынған кезде басталады.
Лейкемияның бастапқы белгілері көбінесе жай шаршау немесе маусымдық аурулармен шатастырылады. Науқастар тез шаршау, әлсіздік, жиі суық тию, терінің бозаруы, себебсіз ұзақ қызу, қызыл иектің қанап кетуі немесе көгеру сияқты белгілерді байқауы мүмкін.
«Бұл белгілерді анемия, витамин жетіспеушілігі немесе шамадан тыс шаршаумен шатастыру оңай. Алайда аурудың нақты клиникалық көрінісі пайда болмай тұрып-ақ, оны анықтауға тек қанның қарапайым талдауы мен тұрақты тексерулер көмектеседі. Лейкемияға күдік болған жағдайда нақты зерттеулер тағайындалады: толық қан талдауы, сүйек кемігін пункциялау және цитогенетикалық тесттер», – дейді Мадина Мирзаева.
Бүгінде онкогематологияда тиімді емдеу әдістері қолданылады: химиотерапия, таргеттік препараттар, иммунотерапия және сүйек кемігін трансплантациялау.
Заманауи тәсілдердің арқасында лейкемияның көптеген түрлерін бақылауда ұстауға болады, кейбір жағдайларда ұзақ мерзімді ремиссияға қол жеткізу мүмкін.
«Егер әлсіздік, себепсіз көгерулер немесе жиі жұқпалы аурулар бірнеше апта бойы жалғасса, міндетті түрде терапевтке немесе гематологқа қаралу қажет», – деп атап өтті онколог.
Есіңізде болсын: Лейкемия ұзақ уақыт бойы жасырын түрде өтуі мүмкін. Өз денсаулығыңызға мұқият қарау және тұрақты профилактикалық тексерулер ауруды ерте кезеңде анықтауға мүмкіндік береді. Ал ерте анықталған ауру – тиімді емнің кепілі.
Сіз жаңалықтар туралы не ойлайсыз