2025 жылғы 9 қыркүйекте жаңа iPhone 17 таныстырылды. Бұл оқиға дәстүрлі түрде қолданылған смартфондар нарығындағы жағдайды өзгертті. Жаңа модель шыққаннан кейін алдыңғы буын иелері ескі гаджетін сатуға және жаңа телефон алуға бола ма деген сұрақ қояды. OLX Қазақстан аналитикалық қызметі жаңа смартфон шыққаннан кейін хабарландыру саны қалай өзгеретінін зерттеді.
Бағалардың өзгеру динамикасы
Алдыңғы жылдардың тәжірибесі көрсеткендей, таныстырылымнан кейін бірден ескі үлгілерді сату туралы хабарландыру саны күрт өседі. Қолданушылар телефондарын жаңартуға ұмтылады, ал бұл нарықтағы ұсыныстың артуына және сәйкесінше бағалардың төмендеуіне алып келеді.
Жаңа модельдер шыққаннан кейін iPhone бағасы қалай өзгереді
OLX Қазақстан аналитикалық қызметінің деректеріне сәйкес, соңғы бір жылда iPhone 15 және 15 Pro бағасы айтарлықтай арзандады. 2024 жылдың тамызында қолданылған iPhone 15 орташа есеппен 300 000 теңге тұрса, 2025 жылдың тамызында 268 000-ға дейін түсті. Ұқсас жағдай iPhone 15 Pro-ға да тән: 2024 жылы 420 мың теңгеден 2025 жылы 364 мың теңгеге дейін.
iPhone 16 модельдерінде жағдай басқаша болды. 2024 жылғы қыркүйекте жаңа смартфон шыққанда бағалар жоғары болды: жаңа iPhone 16 Pro Max орташа есеппен 760 000 теңге, қолданылғаны — 565 000 теңге тұрды. Алайда 2025 жылдың тамызына қарай бағасы үштен бірге төмендеді: жаңа телефон шамамен 552 000 теңге, қолданылғаны 537 000 теңге болды. Осылайша, iPhone 17-нің шығуына дайындық аясында iPhone 15 бағасы біртіндеп, ал iPhone 16 бағасы айтарлықтай қарқынмен төмендегені байқалады.
Бұл сатушылар үшін нені білдіреді
iPhone 15 және 15 Pro иелері қыркүйектегі таныстырылымнан кейін ұсыныс одан әрі артып, баға түсуді жалғастыратынын ескеруі керек. Егер сату жоспарда болса, құрылғыны iPhone 17 ресми шықпай тұрып қою тиімді.
Ал iPhone 16 жағдайы күрделірек. Бұл модель әлі де жаңа, оған сұраныс 15-ші буынға қарағанда жоғары. Дегенмен, жыл соңына қарай оның бағасы да түседі, әсіресе базалық конфигурацияларында. Ең өтімді болып Pro және Pro Max нұсқалары қала береді — олардың құны баяу төмендейді және баға мен заманауи сипаттамалар арасындағы тепе-теңдікті іздейтін сатып алушылар арасында сұранысқа ие.
Android-пен бәсеке
Қазақстан нарығында iPhone-ға бәсекелес — Samsung. 2025 жылдың тамызында Galaxy S25 Ultra қолданылған күйде орта есеппен 420 000 теңгеге сатылды, бұл iPhone 16 бағасына жуық. Осыған байланысты сатып алушылар енді тек iPhone буындарын ғана емес, сонымен қатар жетекші Android өндірушілерінің үлгілерін де салыстыра бастайды. Бұл да қайта сату бағасына әсер ететін фактор.
Ескі iPhone-ды жөндеу қанша тұрады
Сатудан бұрын иелерін ойландыратын тағы бір сұрақ — смартфонды жөндеу керек пе әлде бар күйінде сатқан тиімді ме? Мысалы, дисплейді немесе аккумуляторды ауыстыру мәміленің соңғы бағасына едәуір әсер етуі мүмкін. Орташа алғанда, батареяны ауыстыру шамамен 9 000 теңге, ал экранды — 15 000 теңгеден басталады. Егер жөндеу құны жұмыс істейтін және істемейтін құрылғының нарықтық бағасы арасындағы айырмашылықтан төмен болса, онда қалпына келтіруге инвестиция салу орынды.
iPhone 17 таныстырылымынан кейін не күтуге болады
Дәстүр бойынша, жаңа модель шыққаннан кейін алғашқы апталарда Қазақстан нарығына шектеулі партия жоғары бағамен түседі. Осы кезеңде алдыңғы жылғы жоғарғы үлгілерге (iPhone 16 Pro және Pro Max) сұраныс жоғары болып қала береді, алайда қараша айына қарай бағалар тезірек төмендейді.
Сондықтан iPhone 15 немесе 16 сатуды жоспарлағандар уақытты созбай әрекет етуі тиіс. Ал сатып алушылар үшін бұл — өткен жылғы флагманды әлдеқайда арзанға алу мүмкіндігі.
Сіз жаңалықтар туралы не ойлайсыз