Жұмыс істейтін қазақстандықтарға скринингтен өту үшін жыл сайын әлеуметтік демалыс қарастырылған.
Еңбек кодексіне сәйкес, қызметкерлерге жыл сайынғы скринингтен өту үшін үш күнге дейін әлеуметтік демалыс беріледі. Бұл кезеңде олардың жұмыс орны да, орташа еңбекақысы да сақталады.
Скринингті кім, қашан және қалай өтетіні туралы Алматы қалалық №11 емханасының профилактика бөлімінің меңгерушісі Алёна Зекунова айтып берді.
Скринингтен өту тәртібі мен ұзақтығы «Халық денсаулығы туралы» кодекспен реттеледі. Аталған кодекстің 80-бабына сәйкес, Қазақстан азаматтарының барлығы профилактикалық тексерулер мен скринингтен өтуге міндетті.
Скрининг белгілі бір халық топтары арасында жүргізіледі, ол ауруларды ерте кезеңде анықтап, асқындырмауға мүмкіндік береді. Сондай-ақ, қауіп факторларын анықтауға және денсаулықты нығайтуға көмектеседі.
Мақсатты топтарға кіретіндер:
40, 42, 44, 46, 48, 50, 52, 54, 56, 58, 60, 62, 64, 66, 68, 70 жастағы ерлер мен әйелдер – артериялық гипертонияны, жүректің ишемиялық ауруын, қант диабетін, глаукоманы, онкопатологияны және мінез-құлықтық қауіп факторларын ерте анықтау үшін.
Жоғарыда көрсетілген жастағы ерлер мен әйелдер (динамикалық бақылауда тұрмайтындар) – артериялық гипертонияны, жүректің ишемиялық ауруын және қант диабетін ерте анықтау үшін.
Жоғарыда көрсетілген жастағы ерлер мен әйелдер (динамикалық бақылауда тұрмайтындар) – глаукоманы ерте анықтау үшін.
30, 34, 38, 42, 46, 50, 54, 58, 62, 66, 70 жастағы әйелдер (жатыр мойны қатерлі ісігі бойынша динамикалық бақылауда тұрмайтындар) – жатыр мойны обырын ерте анықтау үшін.
40, 42, 44, 46, 48, 50, 52, 54, 56, 58, 60, 62, 64, 66, 68, 70 жастағы әйелдер (сүт безінің қатерлі ісігі бойынша динамикалық бақылауда тұрмайтындар) – сүт безі обырын ерте анықтау үшін.
50, 52, 54, 56, 58, 60, 62, 64, 66, 68, 70 жастағы ерлер мен әйелдер (тоқ ішектің қатерлі және қатерсіз ісіктері бойынша динамикалық бақылауда тұрмайтындар) – колоректалды обырды ерте анықтау үшін.
Скринингтен қалай өтуге болады?
Скринингтен өту үшін тұрғылықты жері (тіркелген жері) бойынша емханаға жүгіну керек. Әрбір алғашқы медициналық-санитарлық көмек ұйымында скрининг кабинеттері бар. Өзіңізбен бірге жеке куәлікті алып бару қажет.
Егер жұмыс беруші скринингке жібермесе не істеу керек?
Еңбек министрлігінің мәліметінше, егер жұмыс беруші қызметкерге скринингтен өту үшін әлеуметтік демалыс беруден бас тартса, қызметкер «еңбек жөніндегі уәкілетті мемлекеттік органның аумақтық бөлімшесіне шағымдануға құқылы»
Сіз жаңалықтар туралы не ойлайсыз