«Басты міндет – Қазақстан халқының татулығы мен ауызбіршілігін, мемлекетіміздің тұтастығы мен киелі Тәуелсіздігімізді нығайту», – деген Президент Қасым-Жомарт Тоқаевтың сөзі – этномедиация саласында еңбек етіп жүрген әрбір маман үшін бағдаршам іспетті.
Этномедиация — ел ішіндегі өзара құрметті, сенімді және бейбіт диалогты орнықтыру құралы. Осы бағытта Маңғыстау өңірінде жүйелі жұмыстар атқарылып келеді.
2025 жылға арналған жұмыс жоспарына сәйкес, өңірде ай сайын этномәдени бірлестік мүшелерімен бірге семинарлар, дөңгелек үстелдер тұрақты түрде өткізілуде. «Этномедиация – татулық пен келісім құралы» атты кездесулер өңірдегі қоғамдық келісімді нығайтуға бағытталған.
Маңғыстау облысы түрлі этностар мен мәдениеттер тоғысқан өңір. Мұндай ортада татулық пен түсіністікке жетудің бірден-бір жолы ашық диалог пен тыңдай білудің мәдениетін дамыту. Сондықтан этномедиаторлар жергілікті басқармалармен, білім беру ұйымдарымен және құқық қорғау органдарымен бірлесе отырып, «Елдесу және татуласу» жобасы аясында кең көлемде жұмыстар жүргізуде.
Облыстық мәслихат, прокуратура, сот, білім басқармасы мен полиция департаменті сияқты құрылымдардың қатысуымен өткен ірі дөңгелек үстелдерде этномедиацияның құқықтық негізін жетілдіру, институт ретінде әлеуетін арттыру мәселелері қаралды. Нәтижесінде бірнеше меморандумға қол қойылып, этномедиацияны дамыту бағытындағы серіктестік бекітілді.
Ақтау қаласының 2025 жылы Түркі әлемінің мәдени астанасы атануы – халықаралық байланыстарды нығайтуға үлкен мүмкіндік туғызып отыр. Осыған орай, өңірлік этномедиаторларды шетелдік тәжірибемен таныстырып, жаңа форматтағы алмасу іс-шараларын ұйымдастыру жоспарға енгізілді. Этномедиаторлар – тек дау шешуші ғана емес, сонымен қатар бейбіт өмір мен келісім мәдениетін насихаттаушы тұлғалар. Облыстық этномедиация басқаратын кеңес осы бағытта этномәдени бірлестіктермен, Аналар мен Ақсақалдар кеңестерімен бірлесе отырып, қоғамда келісім мен түсіністік негіздерін нығайтуға күш салып келеді. Мемлекет басшысының бастамаларын негізге ала отырып, Маңғыстау өңірі этномедиация институтының дамуына, құқықтық мәдениетті нығайту мен татулықты сақтау ісіне жүйелі үлес қосуда.
Сіз жаңалықтар туралы не ойлайсыз