ADVERTISEMENT
Жамбыл облысының әкімі Ербол Қарашөкеевтің төрағалығымен өткен кезекті аппараттық кеңесте өңірдегі құрылыс жұмыстарының қарқыны мен салада туындап отырған өзекті мәселелер жан-жақты сараланды.
Құрылыс басқармасының басшысы Ерлан Орынбаевтың хабарлауынша, облыста барлығы 181 нысанның құрылысы жүріп жатыр. Оның ішінде 137 нысан жыл соңына дейін пайдалануға берілмек. Қалған 44-і келесі жылға өтпелі ретінде қарастырылған.
Бүгінге күнге дейін 30 нысан ел игілігіне тапсырылды.
Атап айтқанда, 3 мектеп, 3 денсаулық сақтау нысаны, 12 инженерлік-коммуникациялық инфрақұрылым жобасы, 3 мәдениет үйі, сондай-ақ 8 тұрғын үй мен 1 «Жайлы мектеп» пайдалануға берілді.
Жыл соңына дейін 11 білім беру, 6 денсаулық сақтау, 4 спорт және 9 мәдениет нысаны ашылады деп күтілуде.
«Жайлы мектеп» ұлттық жобасына 2025 жылы 13,5 млрд теңге қарастырылды. Жыл соңына дейін 3 мектептің құрылысын аяқтау жоспарлануда.
Ауыл шаруашылығы саласында 5 маңызды жобаны жүзеге асыру үшін 1,1 млрд теңге бөлінді.
2025 жылдың алғашқы 6 айының қорытындысы бойынша құрылыс жұмыстарының көлемі 11,5 пайызға орындалды. Осы мерзімде 317,7 мың шаршы метр тұрғын үй пайдалануға берілді.
Биыл кезекте тұрған азаматтарды тұрғын үймен қамтамасыз етуге 36 млрд теңге бөлінді. Бұл қаражаттың арқасында 3 805 адам баспаналы болады, оның ішінде 1 865 азамат – халықтың әлеуметтік осал топтары санатына жатады.
Атап айтқанда, 14,5 млрд теңгеге 2 550 пәтерлік 52 көпқабатты тұрғын үй салынса, оның 50-ін (2390 пәтерлі) жыл соңына дейін аяқтау жоспарлануда.
Бұдан бөлек, әлеуметтік осал санаттағы азаматтарды қолдау мақсатында республикалық бюджет есебінен 21,5 млрд теңгеге 1 415 жалға берілетін пәтер сатып алынбақ.
Облыс әкімі өз сөзінде құрылыс жұмыстарының сапасы мен мерзіміне қатысты жүйелі мәселелердің бар екенін баса айтты. Осыған байланысты өңір басшысы жобалық-сметалық құжаттамаларды әзірлейтін компаниялардың жауапкершілігін заң аясында қарастыруды тапсырды.
– Құрылыс, күрделі жөндеу және қайта жаңғыртуға қатысты жобалық-сметалық құжаттар сәулет және қалақұрылысы басқармасына қарасты «Арт бюроның» мұқият сараптамасынан өтуі қажет, – деді Ербол Қарашөкеев. – Бұл құрылым бюджет қаражатын тиімді игеруге және жобалық құжаттарды негізсіз қымбаттатуға жол бермеуге тиіс, – деп нақтылады.
Сонымен бірге құрылыс жұмыстарының мерзімінен кешігуіне байланысты екі негізгі себепті атап өтті.
– Құрылыс жұмыстарының кешігуіне көбіне кеш қаржыландыру немесе сот шешімінің негізінде тоқтатылуы себеп. Жылдық жоспарлау нақты жүргізіліп, мүмкіндігі бола тұра мемлекеттік сатып алу рәсімдерін кейінге қалдырмау керек, – деді өңір басшысы. – Құрылыс жұмыстары сот шешімімен бекерден-бекер тоқтатылмайды. Сондықтан жосықсыз мердігерлерге заң аясында тиісті шаралар қолданылуы керек. Алдағы уақытта «саны бар, сапасы жоқ» мердігерлер өз мүмкіндігін нақты бағалап барып ғана конкурсқа қатысатын болады, – деп түйіндеді Ербол Қарашөкеев.
Аппаратық кеңес қорытындысы бойынша биыл жоспарланған құрылыс нысандарын бақылап, жұмыстардың сапалы әрі уақытында аяқталуын қамтамасыз ету, тұрғын үйге мұқтаж азаматтарға арналған баспаналарды сатып алуды жеделдету тапсырылды.
Сіз жаңалықтар туралы не ойлайсыз