«QazInnovations» инновацияларды дамыту жөніндегі ұлттық агенттігі» акционерлік қоғамы мен Huawei компаниясы Инновациялар мен цифрлық технологиялар саласындағы ынтымақтастықты дамытуға бағытталған өзара түсіністік туралы меморандумға қол қойды.
Қол қою рәсімі Қазақстан делегациясының Қытай Халық Республикасына сапары аясында өтті. Келісімнің мақсаты – озық технологиялық шешімдерді енгізуге, стартаптарды қолдауға және ақпараттық‑коммуникациялық технологиялар, бұлтты шешімдер, жасанды интеллект және цифрлық энергетика саласында білікті кадрларды даярлауға арналған тұрақты платформа құру.
Негізгі бағыттардың бірі адами капиталды дамыту болмақ. Атап айтқанда, Huawei білім беру саласындағы «Seeds for the Future» сияқты бастамаларына белсенді қатысу, сондай‑ақ бірлескен тренингтер мен курстар өткізу жоспарлануда. Меморандум аясында тараптар қазақстандық технологиялық компаниялар мен стартаптар технологияларға, сараптамалық қолдауға және халықаралық сертификаттау бағдарламаларына қол жеткізе алатын бірлескен құзыреттер орталығын құру мүмкіндігін де қарастырады.
«QazInnovations Қазақстанның технологиялық дамуына арналған берік экожүйе құруға ұмтылады. Huawei‑мен ынтымақтастық бізге озық шешімдерді енгізіп қана қоймай, қазақстандық мамандар мен компаниялардың жаһандық технологиялар мен үздік тәжірибелерге қол жеткізуін қамтамасыз етуге мүмкіндік береді. Бұл меморандум жаңа технологияларды дамыту мен қазақстандық стартаптардың өсуіне жағдай жасауға бағытталған практикалық өзара іс‑қимылдың негізіне айналады», — деді «QazInnovations» Ұлттық инновацияларды дамыту агенттігі» АҚ Басқарма төрағасы Санат Жолдыхан.
Ынтымақтастық аясында тараптар аналитикалық деректермен алмасып, бірлескен іс‑шараларға – хакатондарға, форумдар мен конференцияларға қатысады, сондай‑ақ арнайы құрылған жұмыс тобы арқылы нақты жобаларды іске асыруды үйлестіреді.
«Қазақстан цифрлық даму саласында жоғары әлеуетке ие. Біз елдің цифрлық трансформациясына білім мен технологияларды жеткізіп, АКТ саласындағы жас мамандар буынын қолдау арқылы үлес қосуға қуаныштымыз. QazInnovations‑пен ынтымақтастық жаһандық тәжірибе мен жергілікті бастамаларды біріктіріп, Қазақстанның технологиялық дамуын жеделдетуге мүмкіндік береді», — деп атап өтті Huawei Technologies Kazakhstan компаниясының бас директоры Сун Ясюй.
QazInnovations пен Huawei арасындағы әріптестік Қазақстан экономикасының орнықты дамуына және цифрландыруға үлес қосып, халықаралық сараптамалар мен озық технологияларды елге тартуға жәрдемдесуі тиіс.
Сіз жаңалықтар туралы не ойлайсыз