2025 ЖЫЛДЫҢ I ЖАРТЫСЫНДА ЖАҢА АВТОМОБИЛЬДЕРДІҢ САТЫЛЫМЫ 26,2%-ҒА ӨСТІ
«Қазақстанның Автокөлік Одағы» (ҚАО) мәліметінше, маусымда жаңа көліктердің сатылымы өткен жылдың осы айымен салыстырғанда 16,2%-ға өсіп, 19 402 жеңіл және коммерциялық техника сатылды. Жалпы алты айда 104 869 техника сатылды, бұл 2024 жылдың алғашқы жартысындағы нәтижеден 26,2% жоғары (83 092 бірл.).
Анар МАҚАШЕВА, ҚАО президенті: «Биыл жаңа автомобильдердің сатылымы төрт ай қатарынан 19 мың деңгейінде тұр. Бұл – жаңа көліктердің қолжетімді болуына байланысты. Мұның өзі екінші нарыққа да әсер етуде. Бұрын жаңа көлік алу туралы ойламаған көптеген қазақстандықтар енді ресми автосалондарға барып, өздеріне техника таңдап жүр. ҚАО болжамынша, бұл үрдіс алдағы айларда да сақталады. Жалпы, рекордтық сатылым – автопарктің жаңаруы, экологияның жақсаруы және жаңа көлік мінсем деген арманы шындыққа айналған он мыңдаған Қазақстан азаматы деген сөз».
Жаздың алғашқы айында ең көп өткен 10 көлік қатарында әдеттегідей Hyundai көш бастады (4116 бірл.; былтырғы маусыммен салыстырғанда +17,2%). Күміс жүлде Chevrolet-ге бұйырды (2228 бірл.; +22,8%), бірақ оның үшінші сатыдағы Kia-дан небәрі 25 машинасы артық өткен (2203 бірл.; -26%). Төртінші орынға талас күшейіп келеді. Бұл жолы Jetour бренді төртінші сатыға қайта көтерілді (1493 бірл.; +125,5%), 1417 моделі иесін тапқан Chery бесінші орынға тұрақтады (+14,4%). Одан бөлек тізімде Changan (1158 бірл.; +123,6%), Haval (1025 бірл.; +52,1%), Jac (852 бірл.; -24,5%, Toyota (849 бірл.; -24,9%) және Geely (773 бірл.; +23,1%) бар.
Маусымда аса танымал болған модельдер рейтингінің бас жағында еш өзгеріс жоқ, Chevrolet Cobalt (1762 бірл.) оза шапса, оны өкшелеп Hyundai Tucson (1503 бірл.) келеді. Үштікті Kia Sportage (947 бірл.) түйіндеді. Төртінші қатарға Hyundai Elantra (875 бірл.) орналасты, бесінші орын Changan CS55 Plus-қа (659 бірл.) бұйырды. Сонымен қатар тізімге Chery Tiggo 7 Pro (578 бірл.), Hyundai Mufasa (568 бірл.), Jetour X70 (528 бірл.), Chery Tiggo 2 (488 бірл.) және Kia Sorento (479 бірл.) енді.
Биылғы алты айды қорытындыласақ, брендтер арасында Hyundai (24 218 бірл) басым (+32,8%), екінші орындағы Chevrolet дилерлері 13 306 машинаның кілтін тапсырды (+66,9%). Kia 11 319 сатылған автомобильмен жартыжылдықты аяқтады (-1.7%). Бәсекелестер көбейгенмен, төртінші орын әлі де Chery-дің еншісінде. Одан кейін Jetour (7242 бірл.; +86,3%), содан соң Haval (5794 бірл.; +38,9%) тұр. Geely көліктері жетінші орынға көтерілсе, Changan (5005 бірл.; +18,8%) сегізінші сатыға жайғасты. Jac (4727 бірл.; -8,2%) тоғызыншы орынды қанағат тұтты. Ең көп өткен маркалар тізімін Toyota (4559 бірл.; +1%) түйіндеді.
ТОП-20: 2025 ЖЫЛДЫҢ МАУСЫМЫНДАҒЫ ЖЕҢІЛ ЖӘНЕ КОММЕРЦИЯЛЫҚ ЖАҢА АВТОМОБИЛЬ САУДАСЫ
| МАУСЫМ | ҚАҢТАР — МАУСЫМ | |||||
| 2024 | 2025 | % | 2024 | 2025 | % | |
| Hyundai | 3 512 | 4 116 | 17,2% | 18 239 | 24 218 | 32,8% |
| Chevrolet | 1 815 | 2 228 | 22,8% | 7 974 | 13 306 | 66,9% |
| Kia | 2 979 | 2 203 | -26,0% | 11 520 | 11 319 | -1,7% |
| Jetour | 662 | 1 493 | 125,5% | 3 888 | 7 242 | 86,3% |
| Chery | 1 239 | 1 417 | 14,4% | 6 642 | 7 315 | 10,1% |
| Changan | 518 | 1 158 | 123,6% | 4 214 | 5 005 | 18,8% |
| Haval | 674 | 1 025 | 52,1% | 4 170 | 5 794 | 38,9% |
| Jac | 1 128 | 852 | -24,5% | 5 150 | 4 727 | -8,2% |
| Toyota | 1 130 | 849 | -24,9% | 4 514 | 4 559 | 1,0% |
| Geely | 628 | 773 | 23,1% | 3 255 | 5 271 | 61,9% |
| GAZ | 376 | 305 | -18,9% | 2 026 | 1 894 | -6,5% |
| Lexus | 247 | 277 | 12,1% | 1 694 | 1 265 | -25,3% |
| Tank | 154 | 253 | 64,3% | 958 | 1 127 | 17,6% |
| Lada | 12 | 243 | 1925,0% | 427 | 1 393 | 226,2% |
| Skoda | 75 | 241 | 221,3% | 146 | 1 165 | 697,9% |
| BYD | 200 | NEW | 598 | NEW | ||
| Omoda | 195 | 153 | -21,5% | 1 041 | 796 | -23,5% |
| Kamaz | 77 | 133 | 72,7% | 356 | 623 | 75,0% |
| Exeed | 153 | 126 | -17,6% | 911 | 848 | -6,9% |
| Kaiyi | 63 | 113 | 79,4% | 97 | 584 | 502,1% |
| Басқалар | 1 054 | 1 244 | 18,0% | 5 870 | 5 820 | -0,9% |
| Жалпы нәтиже | 16 691 | 19 402 | 16,2% | 83 092 | 104 869 | 26,2% |
Анықтама:
«Қазақстанның Автокөлік Одағы» (ҚАО) – «Казахстанский Автомобильный Союз» заңды тұлғалар бірлестігі – 2023 жылдың 21 шілдесінде Астанада құрылған коммерциялық емес құрылым.
ҚАО құрамына Қазақстанның автоөндірушілер қауымдастығы; Қазақстанның автокомпонент өндірушілері қауымдастығы; Қазақстанның дилерлер қауымдастығы; Қолданылған автокөлік бизнесі қауымдастығы; Қазақстанның автосарапшылар және аудиторлар қауымдастығы (автомобильжасау өнімдерінің сәйкестігін бағалау) кірді.