Жаз келген сайын қазақстандықтар күн аса қатты ыстық болмайды деп үміттенеді. Алайда табиғат өз дегенін жасайды – сынап бағанасы тағы да шектік деңгейге жақындап қалды. Осыған байланысты, OLX аналитикалық қызметінің деректеріне сәйкес, кондиционерлерге сұраныс күрт өскен. Биыл еліміздің ірі қалаларында сатып алушылар белсенділігі орта есеппен екі есе артса, кейбір өңірлерде бұл көрсеткіш үш есеге жуықтаған.
Сұраныстың ең айқын артуы Астанада байқалды: жаңа кондиционерлерге қатысты хабарландыруларға жауап саны былтырғы жазбен салыстырғанда 2,8 есеге артқан, ал қолданылған құрылғыларға қызығушылық бірден 3 есеге көбейген. Карағандыда да ұқсас жағдай: жаңа сплит-жүйелерге қызығушылық 2,8 есеге жуық артса, қолданылғандарға – 2 есе. Басқа өңірлер де қалыс қалмады: Шымкентте жаңа кондиционерлерге сұраныс 2,75 есеге, Ақтөбеде – 2,2 есеге, ал Алматыда – 2,3 есеге артқан. Мұндай «бір қарағанда қалыпты» динамиканың өзі мыңдаған тұтынушының сұранысын білдіруі мүмкін – және бұл былтырғыдан әлдеқайда жоғары деңгей.
Жаңа үлгілердің бағасы айтарлықтай өзгермеген. Мысалы, Астанада жаңа кондиционердің орташа бағасы 79 000 теңгеден 82 000 теңгеге дейін өскен, ал Алматыда, керісінше, сәл төмендеп, 66 000 теңгеден 63 000 теңгеге түскен. Шымкентте жоғары сұранысқа қарамастан, баға күрт көтерілген жоқ – 80 000 теңге шамасында сақталуда. Қолданылған техникада баға айырмашылығы айтарлықтай: Астанада мұндай құрылғылардың бағасы 43 000 теңгеден 60 000 теңгеге дейін өскен, ал Ақтөбеде керісінше, 55 000 теңгеден 25 000 теңгеге дейін төмендеген. Бұл – сатушылардың бәсекелестік пен аптап жағдайында тауарды тезірек өткізуге тырысып жатқанын білдіруі мүмкін.
Техникаларға деген қызығушылықтың артуы қызмет көрсетуге сұранысқа да әсер етті. Қазіргі таңда кондиционер орнату, толтыру және жөндеу қызметтерімен айналысатын шеберлердің қолы бос емес. OLX платформасында климаттық қызметтер ұсынатын мамандардың мыңнан астам өзекті хабарландыруы бар. Алматыда тұрғындар көбінесе орнату және жөндеу қызметтеріне жүгінеді – бұл қалада ең көп жауап тіркелген, ал қызметтердің орташа бағасы 20 000-нан 50 000 теңгеге дейін. Шымкентте баға шамамен 15 000-нан 50 000 теңге аралығында, жағдайға байланысты өзгереді, дегенмен қызығушылық жоғары. Астанада баға 30 000-нан 55 000 теңгеге дейін, Қарағандыда шамамен 40 000 теңге. Ал Ақтөбеде бағалар едәуір төмен: орташа есеппен 25 000 теңге. Ал кішігірім қалаларда шеберлер таңдауы шектеулі болғандықтан, қызмет көрсету мерзімі әсіресе аптаптың шарықтау кезеңінде бірнеше аптаға созылып кетуі мүмкін.
Осындай жағдайда мынадай сұрақ өзекті бола түседі: кондиционер сатып алуды кейінге қалдыру керек пе және шынымен де жазғы ыстықтан құтқаратын құрылғыны қалай таңдауға болады? Қазақстандықтар көбінесе қабырғаға орнатылатын сплит-жүйелерге басымдық береді: олар пәтерге де, шағын кеңсеге де ыңғайлы. Қуаттылықты ескеру маңызды: 10 шаршы метрге шамамен 1 киловатт қажет. Электр қуатын үнемдеу үшін энергия үнемділігі жоғары инверторлы үлгілерді таңдаған жөн. Сатып алу кезінде шудың деңгейіне, ауа тазартудың болуына, автоматты режимдерге және, әрине, кепілдікке назар аударған дұрыс. Тағы бір маңызды жайт — орнату сапасы: тіпті ең қымбат үлгі дұрыс орнатылмаса, тиімді жұмыс істемеуі мүмкін, сондықтан тәжірибелі әрі пікірлері бар мамандарды таңдаған абзал.
Ал синоптиктер алдағы күндерге салқындық уәде етпейді. Алматыда температура +39 градусқа дейін көтерілуі мүмкін, Шымкентте шамамен +40 градус, Қарағандыда жаңбырға қарамастан +29 градусқа дейін ысуы ықтимал. Астана мен Ақтөбеде – сәл салқынырақ: аптаның басында +26, кейін +21 градусқа дейін төмендеуі мүмкін. Ел аумағында аптап пен жаңбыр ауысып отырады, бұл “сауна эффектісін” тудыруы мүмкін – сондықтан биыл кондиционер тек жай ғана қалау емес, нақты қажеттілікке айналды.
Ауа райының құбылмалы сипаты мен сұраныстың артуы аясында, кондиционер тұрмыстық техника емес, өмір сүрудің қажетті шарты ретінде қарастырыла бастады. Биылғы жазда нағыз бақытты адамдар – демалыста жүргендер емес, үйінде сплит-жүйесі орнатылғандар сияқты.
Сіз жаңалықтар туралы не ойлайсыз